Gonagaslaš náitaleapmi 1968
Dalá Ruvdnaprinsa Harald ja dalá Sonja Haraldsen vihahuvvuiga Oslo Duopmogirkus borgemánu 29.beaivvi 1968. De ledje gollan ovcci jagi maŋŋil sudno vuosttaš deaivvadeami.
Sivvan dan guhkes vuordináigái, lei dat ahte Ruvdnaprinsa hálidii náitalit áibbas dábálaš nieiddain – gii ii gullan guđege gonagasvissui Eurohpás ii ge lean adel sogalaš. Diet lei ovdalaš konvenšuvnnaid rihkkun, ja dan áiggi dat dagahii garra digaštallama.
Lohpádallan almmuhuvvo
Lohpádallan almmuhuvvui njukčamánu 19. beaivvi 1968. Dalle buvttii Stuoradiggepresideanta Bernt Ingvaldsen čuovvovaš dieđu Gonagas Olavas Stuoradiggái:
"Mun iluin dieđihan didjiide, Presideanta ja Norgga Stuorradiggi, ahte maŋŋel go lean jearran ráđi ráđđehuslahtuin, Presideanttas ja politihkalaš joavkkuid parlamentáralaš jođiheddjiin Stáhtaministara bokte, de mun attán miehtama mu ráhkis bárdnái, Ruvdnaprinsii Haraldii, ahte son odne lohpádalláSonja Haraldseniin, gii lea Karl August Haraldsen rohki ja su eamida, Dagny, riegádan Ulrichsen, nieida».
Dalán go lohpádallan lei almmuhuvvon, de gesse leavgga buot almmolaš visttiide.
Lohpádallan
Viháheapmi
Vihaheapmi lei borgemánu 29. beaivvi diibmu 17:00. Oslo lei čiŋahuvvon leavggaiguin ja liđiiguin, ollu rámbuvrriid lásiin ledje monográmmat ja govat. Lagabui 3000 soalddáha buot vearjosurggiin čužžo bálddabálddalaga dan geaidnoguoras gokko náittusbárra galggai mátkkoštit Šloahtas Duopmogirkui.
Birrasii 850 guossi ledje bovdejuvvon, ja guokte diimmu ovdal vihaheami, dievvagođii Duopmogirku. Girku lei čiŋahuvvon unnimusat 2500 liđiiguin, mat ledje ruvssut, marguerihtat, fresia, eartelieđit ja gladiolat. Go Ráđđevistedoartna biellut časke diibmu 16:30, de vulggii korteša dahje ráidu Šloahtas – ja das ledje oktiibuot 19 biilla. Njunnošiid searvvis lei Ruvdnaprinsa Harald ja su lohpádallanolmmoš, Rosenborgga grev Flemming.
Náittusmoarssi láidii Gonagas Olav áltárii girkoláhti mielde, Henry Purcells ”Trumpet tune and Air” nuohtaide.
Ruvdnaprinaseassa Sonja vihačuvla
Vihačuvla lei ollislaččat vadjon, gorrojuvvon nu ahte čuovvu seakkáža, vuolpu fas geaigána veahá olggosguvlui ja lei oanehs healbmi. Das ledje 3 /4 guhkkosaš soajit mat viidánedje, ja čeabeha bokte lei čuvllas krávva mii ceaggái veahá bajasguvlui. Čuvlii gullá guhkes healbmi. Dat lei darvvihuvvon olggiid bokte ja čuovvu vuolppu finju linjjáid.
Vihačuvla lei gorrojuvvon siberlinas, mii lea lákcaivnnat silkeávnnas nanu kvalitehtas mii čalmmustahtii čuvlla hámi. Soadjegežiin ja krávas ledje gorrojuvvon lieđđehearvvat smávva liidnebihtážiiguin, lastaiguin, helmmuiguin ja čikŋakristállaiguin.
Náittusmoarssis lei guhkes čalbmeluvra ja dat lei darvvihuvvon vilges goanstaliđiiguin mat ledje biddjon oktii dego roseahttan. Roseahta lieđit ledje dat seamma lieđit mat ledje gorrojuvvon hearvan sojiide ja krávas.
Náittusmoarssi bukeahtasledje ruvssut, fresia ja liljekonvállat.
Náittusbárra váccii girkus olggos J. S. Bachs Preludium Ess-dur nuohtaide, ja olggobealde ledje ollu olbmot čoahkkanan illudit ja sávvat sudnuide lihku. Akershusas bávkaledje duppal gonagassaluhta, 2 x 21 skuohta.
Heajat biste golbma beaivvi ja ledje ollu headjaguossit.
Heajat 1968
Čájeha 8 oktiibuot 19
