Gaskal davvi – ja lulliguovlluid

Bindal suohkan lea Trøndelága ráji lagamusas:

–  Bindal suohkanis eallibehtet gaskal davvi-ja lulli guovlluid, gaskal Nordlándda ja Trøndelága. Muhto orrubehtet gal bures birgeme dan dilis- ja váldibehtet buoremus osiid goabbatge osiin, namuhii Gonagas Harald otná sártnis. 

– Olu almmolaš ovttasbargu manná davasi, ja valáštallan, gávppašeapmi ja kulturvásáhusat ges lulás.

Ovdalgaskabeaivve bođii Gonagasbárra Bindal suohkanii Gonagasjaluppain. Govven: Liv Anette Luane, Gonagaslaš hoavva.

Kulturprográmma Seglerplassen-báikkis

Ovdalgaskeabeaivve ollii Gonagasbárra Terråk-nammasaš suohkanguovddážii gos lágiduvvui kulturprográmma Seglerplassen-nammasaš báikkis. Gonagas ja Dronnet vásiheigga sihke lávluma, dánsuma ja oaččuiga maiddái oasáža Bindala historjjás.

Bindalalaš Adrian Jørgensen lávllui lávlaga maid ieš lea ráhkadan, "Tårnseileren". Govven: Liv Anette Luane, Gonagaslaš hoavva

Dáppe lea mearra álo leamaš dehálaš, ja fanashuksenárbevierru lea nanus dán guovllus. Ja danin geigiige sátnejođiheaddji  Britt Helstad earret eará modealla árbevirolaš Bindalsfæringas skeaŋkan Gonagasbárrii.

Peacepainting

Gonagas ja Dronnet beasaiga maiddái gullat gelddolaš vuođđudusa birra man namma lea Peacepainting. Sin sáttasátni lea ráfi, ovttaárvosašvuohta ja oktiigullevašvuohta lundui. Mánát ja nuorat ráhkadit govaid main boahtá ovdan ahte sávvet buoret máilmmi- ráfiin, iluin ja vuoiggalašvuođain buohkaide. Juohke gova nammii ráhkaduvvo maiddái dikta ja  historjá. Ovtta gova váldet ruoktot, nubbi govva biddjo čájáhussii.  

Sin barggut leat čájehuvvon Stuoradikkis, ON-visttis Genevas ja NATO váldoguovddážis. Muhto maiddái olu skuvllain museain, kafeain, hoteallain ja eará báikkiin gos olbmot vánddardit.  Ja buot dát álggahuvvui juste fal Bindalas jagis 2007, ja dál leat 22 riika mielde dás.

Catrine Gangstø muitalii Peacepainting vuođđudusa birra Gonagasbárrii. Govven: Liv Anette Luane, Gonagaslaš hoavva.

Gonagas Harald namuhii maiddái dan prošeavtta su sártnis, ja celkkii ahte dát lea fiidnámus prošeavttaid searvvis maid birra son lea gullan.

- Mu mielas lea dát hirbmat erenoamáš vuohki mot čohkke positiivvalaš searaid. Ja mun sávan váimmolaš lihkkusávaldagaid boahtteáiggi hárrái.

Gonagasbárra beasai oaidnit peacepainting čájáhusa Helgelándda musea ossodaga olggobealde Bindalas. Doppe lei maiddái vejolašvuohta oahppat eanet báikkálaš fanashuksema ja  vuovdedoalu birra. Dasa lassin beasai doppe oahpásmuvvat báikkálaš fitnodahkii, Bindalsbruket, mii skáhppo uvssaid – ja pláhtaid maidda mánát peacepainting-prošeavttas njuhtet govaid.

Gonagasbárra dearvvahii veteránaid Duiskabrigádas, ja maiddái sin geat leat ožžon Gonagasa ánssumedálja. Govven: Liv Anette Luane, Gonagaslaš hoavva.

Dego máidnasis vižžojuvvon

Galledeapmi Bindalas lei maŋemus bisánanbáiki Gonagabára fylkkamátkkis Nordlánddas dán vuoru. Gonagas Harald geahččalii čoahkkáigeassit galledeami su sártnis:

Gonagasbárra deaivvadii journalisttaiguin Bindal galledeami loahpadettin. Govven: Annika Byrde, NTB

– Juohke sajis gos letne fitnan, de lohket olbmot munnuide ahte dán suohkanis lea buoremus orrut, dajai Dronnet.

 – Lea hirbmat buorre gullat ahte buohkat rámidit ja čevllohallet juste sin suohkana geažil.