Vuosttaš skuvlabeaivi
Gonagaslaš Allavuohta Prinseassa Ingrid Alexandra lea álgán Jansløkka mánáidskuvlii Askeris. Sihke váhnemat ja áhkku ja áddjá čuvvo Prinseassa skuvlii vuosttaš skuvlabeaivvi.
Borgemánu 19. beaivi 2010
Gonagas Harald, Ruvdnaprinsa Haakon, Ruvdnaprinseassa Mette-Marit ja Ruvdnaprinseassa eadni, Marit Tjessem, čuvvo Prinseassa Jansløkkai. Dat lea okta dain boarraseamos skuvllain Askeris, ja lea Skaugum lahka.
Prinseassa Ingrid Alexandra álgá 1. luohkkái, ruoná jovkui, ja lea Margrethe Setså Jensen gii lea Prinseassa ja daid eará 21 oahppi oktavuohtaoahpaheaddji.
Buresboahtinprográmma
Rektor sávai ođđa ohppiide buresboahtima olggobealde 1915-vistti. Boarrasit oahppit lávlo Jansløkkalávlaga, ja mánáide muitaluvvui "skuvlariebana" birra. Ja de loahpas čurvo mánáid namaid luohkáid mielde – alit, ruoná, fiskes ja rukses.
Maŋŋá buresboahtin dilálašvuođa manne mánát iežaset luohkkálanjaide.
Vuosttaš Jansløkkas
Prinseassa Ingrid Alexandra lea vuosttaš Gonagasbearrašis gii galgá vázzit Jansløkka skuvlla. Ruvdnaprinsa Haakon ja Prinseassa Märtha Louise vácciiga Smestadas. Smestad lei maiddái Gonagas Haralda mánáidskuvla, muhto soađi geažil lei su vuosttaš skuvlabeaivi Ameriikkas.
