"Under stor press"
Majestehta Dronnet Sonja lea mielde "Under stor press" čájáhusa rahpamis odne. Majestehta Gonagas Harald, Majestehta Dronnet Silvia ja Gonagaslaš Allavuohta Ruvdnaprinsa Haakon leat maid mielde čájáhusa rahpamis, gos Dronnega iežas dáiddalaš barggut maid leat oassin.
Skábmamánu 9. beaivi 2011
Ávvučájáhus «Under stor press – Mästergrafik från Ateljé Larsen» lágiduvvo Dunker Kulturviesus Helsingborggas Ruoŧas. Ateljé Larsen álggahuvvui Helsingborggas 40 jagi dás ovdal ja lea ovdánan ja šaddan okta njunuš báikin gos deaddelit dálááiggi dáidaga.
Ateliea duogášolmmái, deaddeleaddji Ole Larsen, sávvá ahte čájáhus rabastivččii olbmuid čalmmiid nu ahte sii fuobmájit mii grafihkka lea dán áiggi.
Internašunála grafihkkadeaivvadeapmi
Čájáhus dáhttu čájehit mii grafihkka lea sierra ovdanbuktimiin, ja makkár vejolašvuođaid grafihkka-doaba sisttisdoallá. Lea vuosttaš geardi go ná stuora grafihkkačájáhus čájehuvvo Ruoŧas – gos leat mielde 1000 barggu maid 80 internašuvnnalaččat dohkkehuvvon dáiddára leat ráhkadan.
Dronnet Sonja lágida iežas govaid čájáhussan ovttas dáiddáriiguin Kjell Nupen ja Ørnulf Opdahl. Eará norgalaš dáiddárat geat čájáhusas leat mielde, leat Bjørg Thorhallsdottir, Charlotte Thiis-Evensen, Kjell Erik Killi Olsen, Magne Furuholmen, Olav Christopher Jensen, Patrick Huse, Thorbjørn Sørensen ja Vibeke Slyngstad. Buot diein dáiddáriin lea ovttasbargu Ateljé Larsen galleriijain.
Ruoŧa kulturministtar Lena Adelsohn Liljeroth rahpá čájáhusa.
Golbma mátkki – golbma eanadaga
Dronnet Sonja lea ovttasbargan dáiddáriiguin Kjell Nupen, Ørnulf Opdahl ja Ole Larsen dáiddaprošeavttas «Tre reiser – tre landskap». Dan ovttasbarggu boađus lea máhppa mas leat 24 originála veaike- ja polymergova, 8 barggu guđesge dien golmma dáiddáris, ja sii leat vuolláičállán ja nummarastán 50 dain bargguin.
Dronnega dáidagiid vuođđun leat govat Svalbárdamátkkis 2006:s. Dat barggut čájehuvvojit ge dál vuosttaš geardde almmolaččat, Dunker Kulturviesus.
Dáiddárstipeanda
Ovttasbargošprošeavtta ulbmil lea čohkket vuođđokapitála Majestehta Dronnega dáiddárstipendii. Vuođđudus ásahuvvui ođđajagimánu 14. beaivvi 2011, ja dan ulbmil lea oččodit beroštumi – ja movttiidahttit bargat ovddidit báberdáidaga.
Stipeanda addojuvvo vuosttaš geardde 2012:s.
Ávvumállásat
Eahkes leaba Dronnet Sonja ja Ruvdnaprinsa Haakon fárus go Helsingborg gávpot bovde dáiddáriid almmolaš mállásiidda.
