Teknologiija ja dearvvašvuohta
Majestehtaguovttos Gonagas ja Dronnet oahpisteigga Presideantta Doris Leuthard ja dr Roland Hausin Rikshospitálii odne iđđesbeaivvi. Doppe lei seminára medisiinnalaš teknologiija birra, Sveitssa stáhtaguossástallama nuppi beaivvi.
Golggotmánu 15. beaivi 2010
Seminára lea ovttasbargu gaskal MedTech Switzerland ja Oslo Medtech, ja dan ulbmil lei láidet oktii dearvvašvuođasuorggi ja medisiinnalaš teknologifitnodagaid ovddasteddjiid.
Sihke Presideanta Leuthard ja dearvvašvuođaministtar Anne-Grete Strøm-Erichsen doalaiga sáhkavuoru, ovdal go álge presenteret teknologalaš ovdamearkkaid, earet eará movt insulin ja laserkirurgiija sáhttá hálddašit.
Gonagasbárra ja Presideantabárra čuvvo seminára vuosttaš oasi. Dan maŋŋá máhcai Gonagas Šlohttii jođihit Stáhtaráđđečoahkkima, ja Dronnet oahpistii presideantabára Nobelinstituhttii.
Logaldalai Nobelinstituhtas
Nobelinstituhtas lei direktevra Geir Lundestad ja Norgga olgoritpolitihkalaš instituhta jođiheaddji Jan Egeland, geat vuostáiválddiiga gussiid. Go lei čállán namas Nobelinstituhta guossegirjái, de doalai Presideanta Leuthard logaldallama "The World is shifting - where is the European continent heading?". Maŋŋel logaldallama mátkkoštii Presideanta stáhtaministara kantuvrii, gos lei čoahkkin stáhtaministariin Jens Stoltenberg. Maŋŋelaš seamma beaivvi lei Presideanta Leuthard maiddái čoahkkimis olgoritministariin Jonas Gahr Støre.
Almmolaš lunša
Stáhtaministtar Stoltenberg lei guossoheaddji go Ráđđehus lágidii lunšša gudnin svetssa presideantabárrii. Lunša lei stáhtaministara viesus, ja sihke Gonagasbárra ja Ruvdnaprinsabárra ledje doppe.
Konsearta ja vuostáiváldin
Eahkes ledje Gonagas ja Dronnet, Ruvdnaprinsa ja Ruvdnaprinseassa Sveitssa guossit vuostáiváldimis Grand hoteallas. Ambassadevra Denis Feldmeyer lei vuostáiváldima guossoheaddji, ja lágideapmi álggahuvvui konsearttain. Dat lei maŋŋemus oassi lágdemiin ovdal go Presideanta Doris Leuthard ja dr Roland Hausin sávvaba almmolaččat báze dearvan Gonagassii ja Dronnegii ja loahpaheaba stáhtaguossástallama.
