Stáhtaguossástallan Romssas
Davviguovllut leamaš guovddážis daid beivviid go Suoma stáhtaoaivámuš leamaš stáhtaguossástallmis dáppe, ja maŋemus guossástallanbeaivi lei Romssas. Gonagaslaš Allavuohta Ruvdnaprinsa čuovui H.E. Presideantta Niinistö ja su roavvá Haukio otná beaivvi dáhpáhusain.
Golggotmánu 12. beaivi 2012
Prográmma Romssas čalmmustahtii earenoamážit dutkama ja Árktalaš ovttasbarggu. Guossit manne álggos Romssa universitehtii, gos rektor Jarle Aarbakke muitalii oanehaččat universitehta birra, ja de álggahii Presideantta sáhkavuoru man čuovui ságastallan. Ságastallama jođihii suopmelaš dutki Elina Halttunen, gii bargá Romssa universitehtas.
Ulbmil lei oažžut ávkkálaš ságastallama dan birra movt sáhtášii Norgga ja Suoma buori ovttasbarggu akademihkalaš surggiin dahkat vel buorebun. Buot studeanttat ja bargit ledje bovdejuvvon searvat, ja Lauri Lajunen, Oulu Universitehta rektor, lei maid doppe,ovttas ollu eará Suoma dutkiiguin ja fitnodatnjunnošiiguin.
Presideantabárra ja Ruvdnaprinsa Haakon ledje Romssa gávpoga guossit almmolaš lunššas, ja dan maŋŋá manne sii universitehta dutkanfatnasii, F/F Helmer Hanssen.
F/F Helmer Hanssen fatnasis
Sihke Universitehta ja eará dutkanbirrasat geavahit dutkanfatnasa Helmer Hanssen, mii ovddemustá doaibmá Barenstábis ja Svalbárdda birasguovlluin. Doaimmat leat earet eará guollehivvodagaid kárten, geologalaš iskkadeamit, guolástanrusttegiid geahččaleamit, kursset ja workshops.
Fatnasis muitaledje ja ságastalle Romssa, máhtolašvuođagávpoga birra, Árktalaš guovlluid dálkkádatovdáneami , polardutkama ja Norgga-Suoma ovttasbarggu birra. Doppe ledje sihke Framsenteret, Kongsberg Satellite Services, Árktalaš ráđi, Riddobearráigeahču, Barents Watch ja Romssa universitehta Marin bioprospektering ovddasteaddjit.
