Ruvdnaprinsa rabai čájáhusa “Gonagasa biillat”
– Bures boahtin čájáhussii «Gonagasa biillat». Leat hirbmadit illudan dán čájáhussii, dajai Gonagaslaš Allavuohta Ruvdnaprinsa Haakon go oahpistii Dronnet Sonja DáiddaStáljas guovvamánu 10. beaivve.
Guovvamánu 10. beaivi 2022
Guovvamánu 11. beaivve rahppojuvvo uvssat čájáhussii «Gonagasa biillat. Njealji buolvva vuojánat». Čájáhusas beassá oaidnit erenoamáš osiid Gonagasviesu biilačoakkáldagas jagi 1913 rájes otnážii. Rahpanbeaivvi oahpistii Ruvdnaprinsa preassa ja bovdejuvvon gussiid čájáhusas.
Dát čájáhus lea teknologalaš ovdáneami, ođđahutkosiid, elektrihkalaš biillaid ja designa historjá.
– Dá lea árvideames vuosttaš biila mii min bearrašis lei, goit Norggas, dajai Ruvdnaprinsa Haakon ja čujuhii fiskes Mini-Cadillacai, 1912.
Dán stoahkanbiilla attii Stuorra-Británnia Dronnet Alexandra su mánáidmánnái, Ruvdnaprinsa Olav. Das lei alimusleaktu 20 km/diimmus ja dainna sáhtii vuodjit 25 kilomehtera hávális. Nu ahte jus dán stoahkanbiilla váldá mielde muitalussii, de sáhttá dadjat ahte Gonagasviesu vuosttaš biila lei duohtavuođas el-biila.
Gonagas Haakona Minerva jagis 1913 lea Gonagasviesu vuosttaš biila, ja dan gávdná beaivválaččat Teknisk Museum nammasaš dávvirvuorkkás ovttas dainna Mini-Cadillacain.
Erenoamáš muitinveara, ikonalaš biillat čužžot ráidun DáiddaStáljas dán giđa: «Headjabiila» A-5 Lincoln Continental Convertible 1966, biillačoakkáldaga čiegus árdna Packard One Eighty 1942 – mii ostojuvvui soahteáiggis ja lei doaimmas mealgadii 2000-logus, ja vel A-1 Buick Roadmaster 1939, mii dáidá leat Gonagasviesu eanemus dovddus biila. Dan nummargalba A-1 lea nannosit čadnon ráfái, friddjavuhtii ja dasa go Gonagas bođii ruoktot geassemánu 7. beaivvi 1945.
Historjjálaš filbma ja govat čalmmustahttet historjjá das mot gonagas deaivvada álbmogiin. Dat čájehit dáhpáhusaid gos vuojánat leat leamaš guovddážis.
Čájáhus bistá miessemánu 15. beaivái.
