Ođđa čájáhus Dáiddastáljas
Odne rabai Majestehta Dronnet ođđa čájáhusa "Gonagaslaš stállja. Heastadoallu ja ekvipašat 1905-1940". Golggotmánu 13. beaivvi diibmu 11.00 rájes lea stállja rabas olbmuide geat hálidit boahtit geahččat čájáhusa!
Golggotmánu 11. beaivi 2017
Gonagaslaš stállja geavahuvvui earenoamáš ollu dalle dan áiggi go uniovdna bieđganii. Heastadoaluin heite 1940:s. Odne beasai Dronnet Sonja sávvat olbmuide buresboahtima maŋos áiggis, dan áigái go heasttat ledje seamma dábálaččat Oslo gáhtain go biillat leat dál.
- Dán vuoru lea mii mannan njuolga álgoálgui, muitalii Dronnet. - Dán vistti álgui. Gonagaslaš hoava heastadoalu álgui, maid Dronnet Maud fas ealáskahtii. Nugo dán čájáhusas oaidnibehtet, de leat ollu earenoamáš dávvirat áimmuin mat gullet gonagasbearraša heastadollui – nugo dat geavahuvvojedje gitta 2. máilmmisoađi rádjái. Lea stuora illun midjiide dáppe Šloahtas almmustahttit dáid dávviriid dál álbmogii!
Dronnet Mauda stuora beroštupmi heasttaide ja riidemii ealáskahttojuvvui fas bearrašis, golbma buolvva maŋŋá. Lea Prinseassa Märtha Louise gii dál fievrreda dien árbbi viidáseappot, ja son čuovui áŋgirit rahpandilálašvuođa, sihke iežas vásáhusaiguin ja smiehttamušaiguin sihke riidema ja čájáhusa birra, ságastaladettiin Dronnegiin. Prinseassa lea ieš maid oassi čájáhusas, láidesteaddjin Gonagaslaš leaŋgagámmira jietnabálgás.
Čájáhusas čuojahii jazzmusihkar Ellen Andrea Wang ja Ulf Holmene, guhte lea Riikaantikvára fágadirektevra doalai geahppasága Stálja historjjá birra.
Čájáhusas
Čájáhusas oaidnit Šloahta čábbámus vovnnaid, leaŋgadávviriid ja bargoneavvuid.
Dronnet Maudas lei stuora beroštupmi heastadollui ja son lei áŋgir riidet – álo nissonolbmuid sádeliin. Go gonagasbearaš bođii Norgii 1905:s, ođasmahttigođii son Gonagaslaš stálja, ja daid viiddis ođasmahttinbargguid ruhtadii Gonagas Haakon ieš. Dronnet Mauda riidenbiktasat,- dávvirat ja vovdna masa son liikui buoremusat leat oassin čájáhusas.
Gonagaslaš leaŋgagámmir lea vuosttaš geardde rahppojuvvon álbmogii. Dat earenoamáš latnja lea orron goasii áibbas lihkatkeahttá dan rájes Šloahtta heittii heastadoaluin 1940:s. Dáppe leat sihke sádelat, leaŋgadávvirat ja eará biergasat.
Dáhkis ruohttá "Heasta" maid videodáiddár Kristin Günther lea ráhkadan. Dat lea dábálaččat Kistofos -dávvirvuorkkás, muhto leat luoikan dan Dronnet Sonja Dáiddastálja rahpandilálašvuhtii. Diet installašuvdna lea ođđaáiggi oassi daid eará historjjálaš dávviriid siste – muhto barohkka dáhkkemaleriija lea addán dáiddárii inspirašuvnna.
Ihttin rahppo čájáhusolbmuide geat háliidit boahtit geahččat!
