Loahpaheapmi Bergenis
Majestehta Gonagas láidestii Korea Republihka presideantabára guossástallamis KNM Maud skiippas Haakonsvernas Bergenis odne. Stáhtaguossástallan loahpahuvvui Edvard Grieg ruovttus Troldhaugenis.
Geassemánu 13. beaivi 2019
Eksellense Presideanta Moon Jae-in deaivvadii stáhtaministariin Erna Solbergain eske iđđes, go guossástallit bohte Bergenii. Dasto lei lunša Haakonhállas vuosttaš oassi oarjenorgga oaivegávpogis odne. Sátnejođiheaddji Marte Mjøs lei vuostáiváldi ja guossoheaddji dien boares gonagashállas.
Guossástallan KNM Maud skiipas
Logistihkkafanas KNM Maud lea Mearrasuodjalusa stuorámus skiipa. Dat lea 183 mehter guhko, ja nu lea ge arvat guhkit go norgga fregahtat.
KNM Maud lea huksejuvvon Korea Republihkas, Daewoo Shipbuilding and Marine Engineering skiipahuksenfitnodagas. Skiipa gásttašuvvui Bergenis miessemánu 21.beaivvi dán jagi, ja lea navdojuvvon Gonagas Haralda áhku, Dronnet Maud gáibmin.
Gonagas Harald, Presideanta Moon ja su roavvá Kim ožžo dieđuid skiippa birra, ja besse maid oaidnit makkár kapasitehta skiippas lea sirdit gálvvuid eará fatnasiidda.
KNM Maud sáhttá váldit ollu gálvvu, ja sáhttá eará fatnasiidda doaimmahit boaldámuša, niestti, biergasiid mat váilot, ammunišuvnnaid ja ollu eará maid meara alde dárbbašit. Dat mearkkaša ahte eará skiippat sáhttet leat meara alde guhkit áiggi, eai dárbbaš nu dávjá mannat gáddái háhkat dan maid dárbbašit. Maud skiippas lea sadji máŋgga helikopterii, ja das lea maid kapasitehta addit medisiinnalaš veahki ja kirurgiija mii gádju heakka.
Plána mielde galgá KNM Maud oažžut operatiivvalaš militearafanas statusa 20220 jagi mielde.
Loahpahedje Troldhaugenis
Presideantabára stáhtaguossástallan loahpahuvvui Edvard ja Nina Grieg ruovttus Troldhaugenis. Presideanta Moon deattuhii sártnistis lunšša oktavuođas Haakonhállas, ahte Edvard Grieg, ja eandalii su lávlla "Solveigs sang", lea dovddus ollu koreanalaččaide. Ja dieinna lávlagiin sii loahpahedje ge otná smávva konsearttaža.
Soprána Beate Mordal lávllui ja Jens Harald Bratlie čuojahii (piano) - ja soai ovdanbuvttiiga máŋga lávlaga ja lyrihkalaš bihtá ovdal go loahpaheigga olles dilálašvuođa Peer Gynt lávlagiin"Solveigs sang" .
Gonagas Harald dagai earu Presideantabárain Flesland girdihámmanis. Dál mátkkošteaba Presideanta Moon ja su roavvá Kim stáhtaguossástallamii Ruŧŧii. Doppe sávvaba Majestehtaguovttos Gonagas Carl Gustaf ja Dronnet Silvia sudnuide buresboahtima ihttin.
