Lesja máilmmimeaštárat

Ja go Norga lea bajimusas olles máilmmis, deattuhii Ruvdnaprinsa, de dat ferte mearkkašit dan ahte Lesja olbmot lea máilmmimeaštárat eaktodáhtolaš bargguin.

Dasto lei lunddolaš coggalit bargobiktasiid ja searvat eaktodáhtolaš bargui. Ruvdnaprinsabárra ja eará guossit biddjojuvvo bargui; riiffuin ráhput, bordit muoraid ja bargat eará dárbbašlaš bargguid Lesja Gilimuseas.

13 dimbbarviesu mat leat huksejuvvon gaskal 1700– ja 1800–logu, leat čohkkejuvvon olgomuseii. Viesuid leat viežžan Lesja dáluin. Dáppe leat maid čájáhusat, áinnas čájáhusat mat gusket báikkálaš árbevieruide ja duodjái. Juohke geasi barget máŋga čuođis eaktodáhtolaččat museas, sii barget bájis ja láibot dollaviesus. Doppe beasai Ruvdnaprinsabárra maid geahččalit láibut. Marie Jøndal ja Grethe Stavheim Mømb čájeheigga mot galgá leafssaid láibut.

Eaktodáhtolaš bargguin ja doaimmain leat ollu buorit bealit, deattuhii Ruvdnaprinsa sártnistis Lesjas:

- Dat ásahit oktavuođa, addet oaivila, dat váikkuhit ovttasdoibmii nu ahte beassat dovdat juogamasa gullevašvuođa. Dat váikkuhit juogaládje midjiide siskkáldasat. Mii álgit eambbo beroštit das ahte váldit vára das masa mii geavahit áiggi ja áŋgirvuođa. Go bargat juoidá ovttas, masa earáin maid lea beroštupmi, de dat váikkuha min miellaláhkái bures – mis šaddá miella bargat vel eanet, danin go dovdat ahte dat bargu lea dehálaš. Dat lea buorre spirála. Nie mii rievdadit ja nannet servodaga, veahážiid veahážiid mielde – dat álgá juohkehačča iežas siste, dakko bokte maid mii ovttas oažžut áigái.

Lesja girku

Lesja girku lea čáppa ruossagirku, huksejuvvon 1749:s. Ruvdnaprinsa Haakon beasai girku oaidnit dárkileappot, dan čáppa áltártávvala, mii rehkenasto leat meašttirduodjin norgga girku – ja muorračuohppan dáidagis. Lea muorradáiddár Jakob B. Klukstad guhte lea dien távvala duddjon. Dat lea restaurerejuvvon.

16 jahkásaš Frida Gangsås oahpistii Ruvdnaprinssa girkus, ovdal go mánát ja nuorat dievihedje girkui ja lávlo Lesjalávlaga.

Joatkiba Skjåk báikái

Ihttin joatká Ruvdnaprinsabárra fylkkamátkki. De soai fitnaba Skjåk ja Lom suohkaniin.