Gonagasbárra guossin Askøyas
Goalmmát ja maŋemus beaivvi Hordalanda fylkkamátkkis lei Gonagasbárra Askøyas. Stuora oktasaš skuvlakoara sávai Majestehta Gonagassii ja Majestehta Dronnegii buresboahtima go soai lávkiiga gáddái Herdla smávvafanashámmanii.
2019 geassemánnu 20
Sátnejođiheaddji Terje Mathiassen ja politiijameasttir Kaare Songstad sávaiga Gonagasbárrii buresboahtima go soai joavddaiga bruggii gonagasfatnasiin.
Dasto jotke sii mátki viidáseappot Herdla dávvirvuorkái, gos álggos muitaledje Gonagassii ja Dronnegii čázi mielde njoammun bakteriijaid ja čáhceášši birra mainna suohkan dál rahčá. Soai beasaiga deaivvadit dearvvašvuođabargiiguin, sin geaidda njoammun lea čuohcan ja suohkana ovddasteddjiid.
– Moai Dronnegiin bohte din guossái hui earenoamáš dilálašvuođas. Okta dain duođaleamos diliin maid mii eaŋkilolbmot ja servodat sáhttit vásihit, lea dat ahte ii leat buhtis čázi gávdnamis. Dát váttis dilli maid dii lehpet vásihan, ja mii dis ain lea, lea geahččalus olles servodahkii, logai Gonagas sártnistis ollu Askøy ássiide geat ledje boahtán Hertla fortii.
Historjá, kultuvra ja luondu
Strusshavn skuvlajoavku lávllui Askøylávlaga Gonagassii ja Dronnegii, ja de muitalii historihkkár Erling Virkesdal Herdla historjjá.
Herdla lea suolu suohkana davágeahčen, hui dovddus danin go doppe lea rikkis loddeeallin ja luonddureserváhtta masa gullá Herdlevalen ja guhkes geađgesáttogáttit.
– Askøy lea dehálaš oassi Vestlándda riddokultuvra. Guovllu ássi lea čuđiid mielde jagiid báidnan min našuvnnalaš historjjá ja girjjálašvuođa. Báikkálaš olbmuid/stril identitehta lea áiggiid čađa rievdan. Muhto lihkus lea oalle guhkes gaska Amalie Skrams olbmuid/hellemyrsfolket ja otná ássiid gaskkas, ođđaáigásaš Hordalanda riddoguovlluin, logai Gonagas.
Artista Berit Håpoldøy lávllui «De Zee plog» - nederlándalaš skiippa birra mii 1817:s borjjastii Amsterdamas Amerihká guvlui. Skiippas ledje lagabui 600 duiskalaš emigrántta. Davvimearas čuzii issoras garra stoarbma ja skiippa stivli doddjui. Skiipa massii kurssa ja rievddai stivrrár haga Davvimearas, gitta dassážii rievddai gáddái Skjellanger dállodollui Herdla báikkis. Máŋggas olggosfárrejeddjiin bisánedje Bergenguovlluide.
Dasto oaččui Gonagasbárra vejolašvuođa oahpásnuvvat buorebut muhtun Askøy olbmuide ja organisašuvnnaide. Buvddain olggobealde Herdla Musea ledje earet eará Askøy Ealáhussearvi, Birasageanttat, Eaktodáhtolašguovddáš ja Askøy Dearvvašeallinguovddáš.
Hordaland 2019
Gonagasbárra lei fylkamátkkis Hordalandas geassemánu 18. – 20. beivviid 2019. Guossástallan čađahuvvui Jondal, Odda, Granvin, Ulvik ja Askøy suohkaniin. Dás oainnát govaid dien mátkkis.
Čájeha 8 oktiibuot 53