Gonagasbárra Davvesiiddas ja Gáŋgaviikkas

Gonagasskiipa luittii odne iđđes áŋkora Gilivutnii Davvesiidda suohkanis, ja Kongesjaluppen sáhtostii Gonagasbára gáddái, gos sátnejođiheaddji Stine Akselsen sávai sudnuide buresboahtima. Hámmanis beasaiga ge Gonagas ja Dronnet oaidnit báikkálaš gonagasreabbá. Soai beasaiga máistet reabbá, mii vuvdojuvvo divrras restauráŋŋaide miehtá máilmmi.

Ranai ođđa hámmana

Olggobealde Gilivuona skiipaekspedišuvnna ledje ordnen feastta, ja stuora čuojahanjoavku čuojahii go Gonagas ja Dronnet bođiiga. Sátnejođiheaddji sártni maŋŋá beasai Gonagas Harald ja Dronnet Sonja gulat leavgahistorjjá ja Gilivuonaolbmá birra – gii lea viidát dovddus danin go 1.máilmmisoađiáigge oinnii oainnáhusaid ja máhtii einnostit.

Ja de lei áigi gullat Gonagasa sártni. Gonagas Harald rámidii earenoamážit eaktodáhtolaš servviid áŋgiris doaimmaid:

- Min mielas lea dát riddoolbmuid eallinviisodat ahte:”Bargga dan maid sáhtát, doppe gos leat, dainna mii dus lea” dakkár maid mii buohkat galggašeimmet muitit iežamet beaivválaš doaimmain. Eaktodáhtolaš bargit ja buollisearat leat dávjá báikkálaš servodagaid bajásdoallit, ja mii atnit hui árvvus sin bargguid dáppe.

Gonagasa mielas lea maid illudahtti go guollebivdu lassána ja nuorat váldet badjelasaset dien árbbi, ja son beasai maid rahpat ođđa hámmana odne:

- Dát hámman čájeha ge dan ahte suohkan lea bidjan árjaniid nannet guollebivddu ealáhussan. Leat ráhkaduvvon ollu ođđa bárrobuođut, káját ja govdubruggarusttegat mat leat ávkkálaččat riddoguolásteddjiide. Go ná ollu lehpet hámmanii investeren, de dat čájeha ahte dis lea jáhkku boahtteáigái. Sáhtán ge duođaštit ahte “Davvesiiddas dáhpáhuvvá ollu mii lea buorre”, ja daid sániiguin raban mun Gilivuona Siskkit hámmana.

Ledje ceggen máŋga gálvobuvrri odne, ja Gonagasbárra beasai maid ságastallat sámi kultuvrra gaskkusteddjiiguin ja oaččui vejolašvuođa geahččalit ovtta Rukses Ruossa ságastallanbeaŋkkain.

Gilivuona girku

Gilivuona girkus dearvvahedje Gonagas Haralda ja Dronnet Sonja koaralávlumiin sisaboađáhagas, ja soai beasaiga maid návddašit oanehis orgelkonseartta girkus.

Searvegodderáđi jođiheaddji Hjørdis Mauseth muitalii Gonagassii ja Dronnegii geađgegirku birra, mii lei vuosttaš girku mii ceggejuvvui fas Finnmárkui maŋŋel soađi.

Gáŋgaviikkas

Eske veaigin ollii Gonagasbárra Mehámmanii, Gáŋgaviikkas – mii lea Norgga – ja olles Eurohpá davimus nannánsuohkan. Doppe sávai sátnejođiheaddji Inga Manndal buresboahtima ja čuovui Gonagasa ja Dronnega Veviknesset báikái álbmotfestii.

Unnakoaraš, mas leat fárus buot Gáŋgaviika skuvllaid oahppit, lávlo Gonagasbárrii, ja skuvlla musihkkajoavku, ja dan lávlu Aurora Steel lávlo «At me havet». Maŋŋel sátnejođiheaddji sártni, lei eanet lávlun ja dánssat, ja de lei Dronnega vuorru lávket lávdái.

Dronnet Sonja ii leat vuosttaš gearddi fitnamin dáppe. Son muitalii ahte son lea sihkkelastan ruossut rássut Gáŋgaviikka suohkanis, ja juogadii ollu buriid vásáhusaid maid dán guovllus lea muosáhan. Majestehta Dronnet ovdošii go oahpes báikkiide lea fas beassan boahtit:

- Mii galgat dás maŋŋelaš vuolgit Gáŋgaviikii, ja doppe lea Slettnes fyr, gos ”Fotefar mot Nord” kulturbálggis vuolgá, mii manná nuoris nuorrái dološ ássanbáikkiid bázahusaid čađa, gos leat jiehtanasbáđit, imašlaš labyrinta ja dološ myhtat. Illudan dohko fas boahtit!

Dis lea doaimmalaš tuvrasearvi, muhto suohkanis lea maid revyas, musihkas ja falástallamis guhkes árbevierru. Attán stuora gudni ná unna suohkanii – mii gáržžes resurssaiguin lea nákcen ovddidit falástallit sihke fággádallamis, badmintonis ja spábbačiekčamis, geat nagodit birget alimus dási falástallamis Norggas. Árvidit ahte dien duogábealde lea ollu eaktodáhtolaš bargu, ja ollu giitu buot dieid buollisearaide.

Ollu aktivitehtat

Dasto láidestii sátnejođiheaddji Gonagas Haralda ja Dronnet Sonja dearvvahit muhtun Gáŋgaviikka ovddasteddjiid – geat ellet ja doibmet dán báikkis.

Gonagasbára beasai oaidnit nuorra fággádalliid fággádallamin, dearvvahit Skjånes skuvlla stafeahttajoavkku mii lea viehkan 55 kilomehtera Skjånesas Mehámmanii, soai beasaiga maid dearvvahit mánáid ja oahpaheddjiid geat leat ráhkadan rebusviehkama «En liten tur ut». Gonagas ja Dronnet beasaiga maid dearvvahit čuođejahkásaš searvvi Mehamn Kvinne- og Familieforbund ovddasteddjiid, ja muhtun bearraša mas leat Filipiinnalaš ruohttasat. Nordkyn Modellflyklubb čájehii iežaset girdit, ja báikkálaš guolleborramušgoahkka bivddii máistet sihke guollegáhkuid, goikeguoli ja bacalao.

Mállásat goikeguollelovttas

Eahkedii leat ordnejuvvon mállásat goikeguollelovttas Gáŋgaviikka museas. Hoavda Torstein Johnsrud oahpista ja muitala Gonagassii ja Dronnegii musea birra, ovdal mállásiid.