Gonagas Harald dolvojuvvon agálaš vuoiŋŋastanbáikái

Árra iđida rájes juo álge Oslo guovddáža gáhtat devdot. Duháhat háliidedje oaidnit prosešuvnna ja čuovvut seremoniija stuorra šearpmain mat ledje ceggejuvvon olggos.

Ovddasteaddjit 85 riikkas, bearaš ja olbmát, virggálaš Norga, ja lohkameahttun olu olbmot čoahkkanedje prosešuvdnajohtolaga báldii ja stuorra šearpmaid ovdii miehtá riikka čuvvo vai nu čuvvo su hávdái.

Prosešuvdna Šloahtas Duopmogirkui

Akershus-ladnis bávkaledje 21- sáluhta go hávdádusprosešuvdna guđii Gonagaslaš šloahta ja álggahii allamenolaš mátkki Duopmogirkui. Oktan prosešuvnnain gullui Ole Olsena hávdádusmáršša ja Gonagaslaš Gardena signálakorpsas derpe morašmárššarumbbuid.

Gonagasleavga lei lebbejuvvon gistui go Gonagasa adjutántaveahka mieđuštii su.

Majestehta Gonagas Haakon, Gonagaslaš Allavuohta Ruvdnaprinseassa Ingrid Alexandra, Prinsa Sverre Magnus ja Prinseassa Märtha Louise vázze gisttu lagamusas. Majestehta Dronnet Mette-Marit ja Dronnet Sonja čuovuiga biillain A-2.

Olu olgoriikkalaš gonagaslaččat, stáhtaoaivámuččat ja stáhtaministarat, stáhtaválddiid ja Norgga almmolašvuođa ovddasteaddjit čuvvo dasto. Soalddáhat Eanansuodjalusas, Áibmosuodjalusas ja Mearrasuodjalusas čužžo gudnefáktan.

Hávdádusseremoniija Oslo duopmogirkus

Juste ovdal diibmu 13:00 čudje girkobiellut golmma geardde girkuin miehtá riikka. Dan maŋŋel lei minuhta jaskatvuohta, ovdal go girkobiellut fas čudje golbmii álggahandihte hávdádanseremoniija.

Norgga girku preses, Olav Fykse Tveit, jođihii serenoniija.

Sálmmat ja vuoiŋŋalaš musihkka ledje oassin seremoniijas, muhto okta šuokŋa lei erenoamáš. Åge Aleksandersen ja Tuva Syvertsen lávlluiga Alf Prøysena lávlaga "Jørgen Hattemaker", man oallugat dovdet: "Beaivváš báitá du ala, nu ahte suoivvan deaivá mu. Muhto suoidni lea seamma ruonábuohkaide." Gonagas Harald beroštii ovttaveardásašvuođas ja sutnje lei dehálaš buohkaid gieđahallat seamma árvvuin.

Muitosánit

Stuoradiggepresideanta Masud Gharahkhani ja stáhtaministtar Jonas Gahr Støre doalaiga muitosániid. Stuorradiggepresideanta deattuhii mo Gonagas Harald deaivvadii buohkaiguin gudnejahttimiin ja liekkusvuođain. Son duođai oinnii olbmo gii lei das su ovddabealde čuožžumin -iii ge dušše olbmo árvodási.

-Mii dovdat čiekŋalis giitevašvuođa go Gonagas Harald lei Norgga gonagassan 35 jagi. Muhto earenoamážit dan ovddas mo son ollašuhtii dan rolla. Son dagahii allamenolačča olmmošlažžan.

Cahkkehit gintaliid

Máŋggabealatvuohta lei dehálaš árvu Gonagas Haraldii. Iešguđet oskkuid ja eallinoainnuid ovddasteaddjit cahkkehedje gintaliid sutnje seremoniijas– katolihkka, humanista, buddhista, juvddálaš ja muslima – dáidda sániide:

Mii cahkkehit gintaliid giitevašvuođain Gonagas Haralda eallima ja bálvalusa ovddas.
Mii cahkkehit gintaliid giitevašvuođain dan ovddas mii min ovttastahttá.
Mii cahkkehit gintaliid giitevašvuođain liekkusvuođa ja movtta ovddas.
Mii cahkkehit gintaliid giitevašvuođain máŋggabealat searvevuođa, boahtteáiggi oskku ja doaivaga ovddas.

Sárdnidii ráhkisvuođa birra

– Ráhkisvuohta ii noga goassege, logai preses Olav Fykse Tveit sártnistis. Son muitalii sártni birra mas Gonagas Harald namuhii vuostálasti Carl Johan Oftedahla—guhte lei dubmehallon jápmit: Cealkke dearvvuođaid buohkaide min riikkas- cealkke ahte fertethukset Norgga ráhkisvuođain.

Buohkat duopmogirkus čužžo loahpas: Eatnamis don leat boahtán. Eanan don galggat šaddat. Eatnamis don galggat fasttain bajásčuožžilit.

Gonagaslávlla ja sálbma Hávski lea eanan loahpahedje seremoniija, ovdal go hoava hoavda láidestii prosešuvnna olggos Oslo duopmogirkus.

«Missing man»

Go Gonagas Haralda gisttu prosešuvdna guđii Duopmogirku ja jotkkii Akershus šloahta girkui, de Áibmosuodjalus ovdanbuvttii loahpalaš gudnejahttima Gonagas Haraldii. Njeallje F-35-soahtegirdi girdiledje fárrolaga Duopmogirku badjel—ovdal go okta dain guđii eará girdiid ja njulgii bajásguvlui. Dát lei nu gohčoduvvon “missing man- váilon olbmo" seremoniija muitindihte jápmán skihpára. Gonagas Harald lei generála Áibmosuodjalusas.

Prosešuvdna Akershus šloahttagirkui

Smávit prosešuvdna mieđuštii Gonagas Haralda gisttu Duopmogirkus Akershus šloahttagirkui, dán háve Frederic Chopina morašmáršša šuoŋaide. Majestehta Gonagas Haakon čuovui gisttu. Su olgešbealde váccii Ruoŧa Majestehta Gonagas Carl Gustaf ja su gurutbealde Majestehta Gonagas Frederik Dánmárkkus.

Akershus ladnis čužžo Gonagasskiipa «Norge» bargit ja gudnekompaniijat Stuorra-Británnias, Ruoŧas ja Dánmárkkus gudnejahttindihte Gonagas Haralda. Leavggaid luite vulos go gistu manai meattá. Ovddasteaddjit olu organisašuvnnain mat ledje Gonagas Haralda suodjaleamivuolde ledje daid searvvis geat čužžo luoddaguorain Akershus šloahttakapellii.

Civkin nohká

Go gisttu sirde šloahttagirku sisa, de gullui sierra signála Pip av- civkin nohká. Ledje Gonagasskiipa bargit geat njurgo árbevirolaš signála fanasbiippuin. Dáinna lágiin adde signála ahte lea maŋemus háve go Gonagas Harald guođđá skiippa. Gonagas Harald lei admirála Mearrasuodjalusas.

Maŋemus vuoiŋŋastanbáiki

Šloahttagirkus lei priváhta seremoniija bearrašii ja gonagaslaš gussiide. Stuorradiggepresideanta, stáhtaministtar, alimusriektejustitiárius, ja Islándda ja Suoma presideanttat maid ledje das.

Dasto biddjui Gonagas Haralda gistu Šloahttagirku eananvullosaš latnji, Gonagaslaš mausoleumii. Doppe biddjo Gonagas Haralda gistu sarkofágai, mii stellejuvvo Gonagas Olav, Ruvdnaprinseassa Märtha, Gonagas Haakon VII ja Dronnet Maud sarkofágaid báldii.

Maŋŋel hávdádeami

Go seremoniija Šloahttagirkus nogai, de bođiiga Gonagas Haakon ja Dronnet Mette-Marit borgašilljui. Hávdádus lei nohkan, ja leavggat mat ledje libardan beallestákkus gessojuvvoje bajimussii – sihke Akershusas ja prosešuvdnajohtolaga mielde. Gonagaslaš šloahtas lonuhedje morašhervejuvvon Gonagasleavgga, mii lei libardan beallestákkus šloahttabalkoŋŋas, Norgga stáhtaleavggain.

Akershus ladnis gullui duppal gonagassaluhtta 21 bávkalemiin ođđa gonagasa nammii, ja miehta riikka čuodjagohte girkobiellut. Gonagas Haakon dagai gudnedearvvuođaid go gesse leavggaid.

Šloahttabalkoŋŋas

Go gonagaslaš joavku ollii ruovttoluotta Šlohttii, de olbmot dopme Šloahtašilljui. De bođiiga Gonagas ja Dronnet olggos Šloahttabalkoŋgii ja sudno čuovuiga Ruvdnaprinseassa Ingrid Alexandra ja Prinsa Sverre Magnus. Sii dearvvahedje daid oallugiid geat ledje boahtán ja olbmot vuostáiválde sin hirbmat gilljasiigun – ja dát ávvučuorvun šattai vel stuorábun go Dronnet Sonja bođii olggos.