Gonagas Haakon rabai 171. Stuorradikki

Allamenolaš rahpan čalmmustahttá ahte ođđa sešuvdna álgá Stuorradikkis. Dat lea dábálaččat maiddái áidna dilálašvuohta jagis go buot golbma stáhtaválddi čoahkkanit seamma báikái. Stuorradikki áirasat, Ráđđehus ja Alimusriekti oassálastet go Gonagas doallá allamenolaš rahpama.

Gonagas Haakon ja Ruvdnaprinseassa Ingrid Alexandra vujiiga kortešeráiddus Gonagaslaš Šloahtas Stuorradiggái, militeara mohtorsihkkelat čuvvo mielde. Stuorradikkis sávai sierra joavku čieža nammaduvvon stuorradiggeáirasiiguin buresboahtima Gonagassii ja Ruvdnaprinseassai. Dat čiežas čuvvot Gonagasa ja su joavkku nu guhká go leat Stuorradikki visttis.

Truvdnosárdni ja riikka dilli

Stuorradikki áirasat čužžo dan botta go Gonagas Haakon logai truvdnosártni. Gonagas doallá sártni ráđđehusa ovddas ja čilge plánaid boahtte áigodahkii. Dat ahte lea ráđđehusa sáhkavuorru, deattuhuvvo dan bokte ahte stáhtaministtar geige sártni Gonagassii Stuorradiggesálas.

Maŋŋel Truvdnosártni čuovvu riikka dilálašvuođa sáhkavuorru.Lea eahpeformálalaš árbevierrun ahte dán sártni doallá nuoramus ráđđehuslahttu. Dán jagi doalai johtolatministtar Kamzy Gunaratnam dán sártni. Dát sárdni lea ođđadárogillii – mii lea leamaš árbevierrun 1932 rájes.

Vuosttaš geardde

Dát 171. Stuorradiggi lea vuosttaš man Gonagas Haakon VIII rabai. Leabeaivvát ala 35 jagi áigi go Gonagas Harald V rabai Stuorradikki vuosttaš geardde: namalassii 136. Stuorradikki mii rahppui golggotmánu 2. beaivvi 1991. Ja seamma láhkai go Gonagas Haakon lea rahpan Stuorradikki oktii ovdal, go lei Ruvdnaprinsaregentan 2020:s, de lei Gonagas Harald doallan allamenolaš rahpama oktii ovdal, Ruvdnaprinsaregentan jagis 1990.