Gonagas galledii Finnmárkkubrigáda

Gonagasa galledeapmi bisttii guokte beaivvi ja álggii Ruovdevuonna rádjestašuvnnas, moadde miilla Girkonjárgga girdišiljus. Rádjestašuvnnas oaččui Gonagas Haakon dilálašvuođačilgehusa, ja dasto čájehedje sutnje rusttegiid maid soalddáhat geavahit. Son deaivvadii maiddái beatnatbargiiguin, geat ovttas sin njealjejuolggat vehkiiguin bearráigeahččat ráji nuorttas.

Viehkan soalddáhiiguin

Gonagas idjadiirádjestašuvnnas, ja álggahii galledeami nuppi beaivvi hárjehallanviehkamiin ovttas soalddáhiiguin. Iđitborramuša borai ovttas earáiguin, ja de beasai Gonagas Haakon gullat eanet makkár árgabeaivi sis lea rádjeguovlluin ja makkár vásáhusat lea vuosttasgearddebálvalusa soalddáhiin Norga davimus osiin

Maŋŋel oaččui Gonagas diehtojuohkimiid sihkkarvuođadilálašvuođa birra ja das mot aktevrrat rádjeguovlluin ovttasbarget. Politiijameašttir Trond Eirik Nilsen, rádjekommiseara Gøran Stenseth ja bataljovnnahoavda, oberstløytnánta Audun Jørstad, čilgejedje sin iešguđetge ovddasvástádusaid birra ja makkár doaimmaid čađahit dan olis doppe.

Rusttegat hárjehallamii ja bálvalussii

Ruovdevuonnas lei mátki viidáseappot Porsáŋgui ja Finnmárkkubrigáda váldokantuvrii Porsangmoenis. Hálkavári báhčin- ja hárjehallanšiljus Gonagas oinnii rusttegiid mat čájehedje brigáda vejolašvuođaid viidodaga. Daid gaskkas maid čájehejde, ledje K9 artilleriijavovdna, CV90 bombabálkunvovdna, PIORUN áibmosuodjalusvuogádat man sáhttá fievrridit mielde, dronat ja SISU kommándovovdna. Soalddáhat ja bargit adde Gonagas Haakonii oppalašgova das mo sii geavahit rusttegiid hárjehallamii ja bálvalusas.

Porsangmoenis deaivvadii Gonagas Finnmárkku Ruovttusuodjalusbiire 17:in, ja sii muitaledje bargguid ja doaimmaid birra sin guovllus. Doppe lei maid áigi galledit garnisovnna ovttas Norgga Suodjalusdoaimmahagain (Forsvarsbygg), ja maiddái galledit Finnmárkku teknihkalaš bargobáji. Doppe lea sis ovddasvástádus sihkkarastit ahte suodjalusa rusttegat bissot doaimmas ja leat gergosat geavahussii.

Galledeapmi Finnmárkkus attii Gonagassii vejolašvuođa deaivvadit soalddáhiiguin ja siviila bargiiguin geat beaivválaččat barget Norgga ovddas dakkár guovlluin gos leat guhkes gaskat ja árktalaš dálkkádat.