Eallinagi bargan Norgga ovddas
Odne jámii Prinseassa Astrid, 94 jahkásažžan. 14 jagi, gaskal 1954 ja 1968, de leai Prinseassa Astrid Norgga njunušroavvá, ja son čađahii almmolaš doaimmaid gitta lohppii.
Čakčamánu 11. beaivi 2026
Stuora morrašiin vuostáiválddii Majestehta Gonagas sága Prinseassa eretvádjoleami birra.
Prinseassa Astrid lei leaikái, sus lei humora, ja nu lei son dávjá lunddolaččat guovddážis go bearaš čoahkkanii. Son lei čeahppi máinnastit ja sus ledje álo suohtas kommentárat. Sus lei maiddái erenoamáš buorre muitu ja lávii áinnas juogadit muittuid mánnávuođas ja bajásšaddamis - maiddái soahteáiggis. Dát lei riggodahkan sihke bearrašii ja ustibiidda, muhto maiddái historihkkáriidda, girječálliide ja mediai.
Vuosttašroavvá
14 jagi lei Prinseassa Astrid riikka vuosttašroavvá ja áhčis, Gonagas Olav, olgeš giehta. Dán doaimma válddii son badjelasas go lei dušše 22 jagi boaris go su eadni, Ruvdnaprinseassa Märtha, jámii jagis 1954.
Son ovddastii Norgga mátkkiid ja eará ovddastandoaimmaid bokte. Prinseassa Astrid ovddastii riikka okto dahje son čuovui Gonagasa ja Ruvdnaprinssa stuorát doaluide miehtá Norgga. Stáhtagalledemiin ja eará oktavuođain lei son doalloeamit go Šloahtas ja Skaugumas ledje gaskabeaivvit. Son lei maid áhčis, Gonagas Olav, fárus su sivdnádallanmátkkis 1958:s ja Gonagasmátkkošteamis Davvi-Norggas jagi maŋŋil.
Bearaš
Skábmamánus jagis 1960 almmuhuvvui lohpádaddan gaskal Prinseassa Astrid ja Johan Martin Ferner. Soai náitaleigga Asker girkus ođđajagimánu 12. beaivvi 1961. Gonagas Olav mearridii dasto ahte su nieida galggai das rájes gohčoduvvot Prinseassa Astrid, Ferner roavvá.
Suoidnemánus 1962 riegádii sudno vuosttaš mánná, Cathrine. Áiggi mielde oaččuiga oktiibuot vihtta máná.
Johan Martin Ferner jámii ođđajagimánu 24. beaivve 2015.
Go Ruvdnaprinsa Harald náitalii jagis 1968, de válddii Ruvdnaprinseassa Sonja badjelasas Norgga vuosttašroavvá-rolla. Muhto Prinseassa Astrid ain ovddastii Norgga ja Gonagasviesu smávit ja stuorát oktavuođain. Jahkásaččat ledje sus máŋga almmolaš doaimma, ja son čuovvolii suddjendoaimmaid. Su doaimmas Prinseassa Astrid čájehii erenoamáš ovdamorraša servodaga heajumusaide, ja olbmuide geain leat liige hástalusat.
Son lei maiddái Ruvdnaprinseassa Märtha muitofoandda stivrajođiheaddji. Dát foanda juolluda ruhtadoarjaga organisašuvnnaid ja servviid sosiála ja humaniteara doaimmaide.
Deaivvadii olu erenoamáš olbmuiguin
Prinseassa Astrid deaivvadii oallugiiguin iežas guhkilmas áiggi čađa almmolaš bálvalusas, sihke stáhtaoaivámuččaiguin ja kulturolbmuiguin. Fearán man birra ollu lea ságastallojuvvon, geavai 1960 geasi, go son galledii Paramount Studios Hollywoodas ovttas Dánmárkku prinseassa Margrethein ja Ruoŧa prinseassa Margarethain. Doppe sii deive nuorra Elvis Presley gii lei báddeme filmma G.I. Blues.
Prinseassas lei erenoamáš stuora ja buolli beroštupmi valáštallamii, ja lávii iežas gohčodit “valáštallanjallan”! Čehppodagain ja beroštumiin lávii son oskkáldasat čuovvut gilvvuid Holmenkollenis. Dasa lassin lávii son dávjá čuovvut valáštallandoaluid miehtá Norgga – áinnas vielljainis, Gonagas Harald. 80-jagi oktavuođas 2012:s, oaccui son Čuoigansearvvi Birkebeinerplakeahta go nu viššalit lei dorjon sábetvaláštallama.
Gudnipenšuvdna
Prinseassa Astrid barggai ja doaimmai ovttas golmma gonagasain – su áddjá, su áhčči ja su viellja. Dušše guokte vahku ovdal go jámii, de eretvádjolii Gonagas Harald V, ja su neahpi, Gonagas Haakon VIII, šattai gonagassan. Prinseassa Astrid bálkkašuvvui su stuorra áŋgiruššama ja liekkus lojálavuođa ovddas 2002:s, go ráđđehus juolludii sutnje gudnepenšuvnna su 70-jagi beaivvi-oktavuođas.
"Norgga stáhta lea mearridan čájehit ahte árvvusatnit dan barggu maid Prinseassa Astrid, Ferner roavvá, lea bargan Norgga ovddas. Álggos riikka vuosttašroavván ollu jagiid, ja maiddái go dan máŋŋil ain lea doaimmahan ollu ovddastanbargguid. Dan sivas son oažžu gudnipenšuvnna stáhtakássas ánsun dan barggu ovddas maid son lea bargan Norgga ovddas."
