Gonagas Haakona biografiija
Majestehta Gonagas riegádii suoidnemánu 20. beaivvi 1973 Riikahospitálas Oslos Gonagas Haralda ja Dronnet Sonja bárdnin ja árbbolaš Norgga truvdnui.
Gonagas Haakon bajásšattai son Skaugumis Askeris ovttas váhnemiiguin, dalá Ruvdnaprinsa Haraldiin ja Ruvdnaprinseassa Sonjain, ja oappáin Prinseassa Märtha Louise,gii lei sus guokte jagi boarráset. Váhnemat deattuheigga ahte soai galggaiga oažžut nu dábálaš bajásšaddama go vejolaš.
Juo mánnán beroštii Gonagas Haakon čáhcevaláštallamis, olgoáibmodoaimmain ja musihkas. Dáid beroštumit leat čuvvon su maiddái ollesolbmoeallimii, ja leat áiggi mielde maiddái gártan oassin su virggálaš doaimmain go áŋgiruššá valáštallama, luonddu ja olgoeallima ovddas.
Norgga ruvdnaprinsa- ja gonagas
Prinsa Haakon šattai Norgga ruvdnaprinsan go su áddjá Gonagas Olav eretvádjolii ođđajagimánu 17. beaivvi 1991:s. Seamma jagi devddii Ruvdnaprinsa 18 jagi, ja su válddálašvuođabeaivve, suoidnemánu 20. beaivvi 1991, searvvai son vuosttaš geardde stáhtaráđđái áhčis Gonagas Haralda fárus.
Ruvdnaprinsa doalai maid iežas vuosttaš virggálaš sártni go giittii borramuša ovddas maŋŋel mállásiid maid ráđđehus lágidii sutnje Akershus šloahtas, suoidnemánu 20. beaivvi 1991:s.
Ruvdnaprinsa čuovvolii áhčis Norgga gonagassan go Gonagas Harald jámii borgemánu 28. beaivve 2026. Seamma ládje go su áhčči, áddjá ja máttaráddjá, válljii son válgasániid “Buot Norgga ovddas”. Čakčamánu 1. beaivve vuortnui son váli Vuođđoláhkii allamenolaš seremoniijas Stuorradikkis.
Áŋgiruššan
Ruvdnaprinsan čađahii Gonagas Haakon ollu virggálaš galledemiid miehtá Norgga juohke jagi. Su doaimmat čájehedje su áŋgirvuođa birrasii ja ceavzilvuhtii, nuoraide ja riikkaidgaskasaš bargui. Su prográmmas lei maiddái guovddážis fitnodatdoallu ja árvoháhkan, ja dasa lassin lei erenoamáš áŋgiruššan gründerdoaimmaide ja ruoná molsumii.
Jahkásaččat jođihii son maiddái máŋga doaimma olgoriikkas ráđđehusa ovddas dainna ulbmiliin ahte hukset oktavuođaid gávppašeamis ja ealáhusdoaimmain, dutkamis ja kultuvrras.
Jagis 2012:s vuolggahii Gonagas Haakon SIKT konferánssaásaheami.Dohko čoagganit jahkásaččat sullii 200 nuorra jođiheaddji ja taleantta, iešguđetlágan surggiin ja sektoriin Norgga gávpogiin. Ruvdnaprinsabára foanda doarju prošeavttaid mat fátmmastit nuoraid geain lea riska manahit gullevašvuođa searvevuhtii.
Gonagas Haakonis lea nanu áŋgiruššan internationála áššiide, ja de earenoamážit beroštupmi gažaldagaide mat gusket nuorra jođiheddjiide, ceavzilvuhtii ja geafivuođa eastadeapmái. 2003:is nammaduvvui son goodwillambassadevran ONa ovdánahttinprográmmii, UNDP.
Gonagas Haakona internationála áŋgiruššan guoská maiddái dálkkádat- ja birasgažaldagaide, ja lea earenoamážit sáhka mearas, poláraáššiin, luonddugáhttemis ja dálkkádatrievdamiid eastadeamis. Sus lea erenoamáš beroštupmi ipmirdit mo teknologiijain ja innovašuvnnain sáhttá ráhkadit čovdosiid dasa mot váldá vára luonddus ja dálkkádagas sihke Norggas ja máilmmis muđui.
Oahppu
Gonagas Haakonis lea oahppu sihke universitehtas ja Suodjalusas. Sus lea bachelorgráda stáhtadiehtagis ja mastergráda ovdánahttinsuorggis.
Ruvdnaprinssa oahppu
Oahppu
Dalá Prinsa Haakon álggahii oahpu Smestad Skuvllas Oslos, seamma ládje go iežas áhčči.Nuoraidskuvllačađahii son Kristelig Gymnasiumas Oslos ja seamma skuvllas čađahii son maiddái joatkkaskuvlla mainna gearggai 1992:s.
Ruvdnaprinssas lea oahppu sihke universitehtas ja Suodjalusas.
Ruvdnaprinssas lea bachelordási oahppu stáhtadiehtagis University of California Berkeleyas (1999) ja mastergráda ovddidanoahpus London School of Economics and Political Science gos čiekŋudanfáddán lei riikkaidgaskasaš gávppašeapmi ja Afrihká.
1999 čavčča lei son hárjehallin Norgga sáttagottis ON:as New Yorkas gos son earret eará čuovui Generálačoahkkima goalmmát lávdegotti barggu. 2001:s čuovui Ruvdnaprinsa Olgoriikadepartemeantta aspirántagurssa.
Náittosdilli ja bearaš
Borgemánu 25. beaivvi 2001 náitalii dalá Ruvdnaprinsa Mette-Marit Tjessem Høibyain Oslo Duopmogirkus. Bisma Gunnar Stålsett vihahii bára.
Heajaide ledje bovdejuvvon Eurohpá gonagasviesuid, virggálaš Norgga ja organisašuvnnaid ovddasteaddjit lassin bearrašii ja ustibiidda. Maŋŋel vihaheami ledje Šloahtas feastamállásat.
Dađistaga fárrii ođđa ruvdnaprinsabárra truvnnoárbbolačča almmolaš ásodahkii- Skaugum Askeris.
Bearrašis leat golbma máná: Marius Borg Høiby, Gonagaslaš Allavuohta Ruvdnaprinseassa Ingrid Alexandra ja Prinsa Sverre Magnus.
