Gonagaslaš mausoleum
Buot Gonagasviesu miellahtuid maŋemus vuoiŋŋastanbáiki lea Gonagasaš mausoleum Akershus šloahtas. Nu lea leamaš dan rájes go Norga oaččui iešheanalašvuođa jagis 1905.
Gonagaslaš hávdebáiki
Go Dronnet Maud jámii 1938:s, de mearriduvvui ahte gonagaslaš hávdebáiki galggai leat Akershus šloahtas. Hávdáduskapealla lea arkiteakta Arnstein Arneberg hábmen 1939:s ja dat lea huksejuvvon Akershus šloahta girku lahka. Dat lea huksejuvvon Askera kálkageađggiin ja siste leabiddjon Liera márbmora. Mausoleum vihahuvvui 1949:s.
Jagi 2026 rádjái ledje hávdekapeallas guokte duppal sarkofága, maid maiddái Arnstein Arneberg lea hábmen.
Gonagas Harald V
Jagis 2024 mearriduvvui ahte galggai ráhkaduvvot ođđa sarkofága Gonagas Harald ja Dronnet Sonja maŋemus vuoiŋŋastanbaikin. Dán sarkofágas dál vuoiŋŋasta Gonagas Harald.
Maŋŋel priváhta seremoniija Akershusa šloahttagirkus hávdádusbeaivvi, čakčamánu 9. beaivvi 2026, de biddjui Gonagas Haralda gistu mausoleumii ja dan maŋŋel biddjui sarkofágii, man Snøhetta lea hábmen.
Sarkofága mas Gonagas Harald vuoiŋŋasta lea hábmejuvvon dego fanasfievru mas lea jorbejuvvon vuođđu – mii lea inspirerejuvvon Gonagasa lagas oktavuođas merrii. Hápmi suodjala dan mii lea siskkobealde ja fievrrida dan dorvvolaččat viidáseappot. Motiiva bidjá maiddái historjjálaš parallealla ovddeš áiggiid skiipahávdádusaide, gos skiipa fievrridii jápmán olbmo su loahppamátkái nuppi riikii.
Vuosttaš sarkofága
Gonagas Haakon VII ja Dronnet Maud
Guovdu lanja čuožžu vilges duppalsarkofága mii lea ráhkaduvvon Nordlándda márbmoris, Fuoskkus. Gonagas Haakon VII ja Dronnet Maud vuoiŋŋasteaba dás. Sarkofága lea čiŋahuvvon earret eará gonagaslaš vearjjuin, kruvnnuin ja miehkiin, ja maiddái namaiguin ja dáhtoniiguin.
Dronnet Maud jámii 1938:s. Muhto duiskalaččaid falleheami geažil 1940:s ii dolvojuvvon Dronnet Mauda gistu maŋemus vuoiŋŋastanbáikáiovdal juovlamánus 1949. Gonagas Haakon hávdáduvvui golggotmánu 1. beaivvi 1957:s.
Gonagas Olav V ja Ruvdnaprinseassa Märtha
Vilges márbmorasarkofága olgešbealde vuoiŋŋasteaba Gonagas Olav V ja Ruvdnaprinseassa Märtha sevdnjesruoná sarkofágas patinerejuvvon bronssas. Maŋŋel go Ruvdnaprinseassa Märtha jámii 1954:s, de oaččui Arneberg bargun hábmet dán maiddái. Sarkofága gárvánii geasset 1957:s.
Maŋŋil Gonagas Olava hávdádusbálvalusa Oslo duopmogirkus ođđajagimánu 30. beaivvi 1991, de fievrriduvvui áikagistu Akershusa šloahttagirkui priváhta muitoboddui. Dan maŋŋel biddjui gistu sarkofágii Ruvdnaprinseassa Märtha lusa.
