Gonagas Haralda ja Dronnet Sonja sivdnádallan

Lei Gonagasbára oktasaš sávaldat ahte soai háliideaba sivdnádallojuvvot iežaska doibmii sierra seremoniijas Nidarosdomenis. Lei hirbmat allamenolaš ja muitinveara seremoniija goappašagaide.

Seremoniija

Nidarosdomenis válddiiga Nidarosa bisma Finn Wagle ja Oslo bisma Andreas Aaflot, vuostá Gonagasbára. Bisma Wagle rávkkai Gonagassii buresboahtima sániiguin:
Váre Ipmil várjalivččii du boahtima ja vuolgima otná rájes agalašvuhtii.

Prosešuvdna jotkkii sisa girkui, ja Gonagas ja Dronnet čohkkedeigga ruvdnenstuoluide mat ledje gávdnon 1818 rájes. Maŋŋil sártni ja teakstalohkama, bisma logai buressivdnádusrohkosa, ja Gonagas Harald lávkii ovddosguvlui.

Gonagas čippustii allaáltárii. Bisma Wagle bijai gieđas Gonagasa oaivvi ala ja rohkadalai:

”Buotveagalaš Ipmil, don leat leamaš min ássanbáikin sogas sohkii, ja du riika ii earáhuva goassege. Don leat Hearrá ja du ovdii fertii juohke čibbi sojaldahttojuvvot. Mii rohkadallat, geahča árpmuinat su beallái gii čippustallá dás du muođuid ovddas.

Sivdnit Gonagas Harald V, nanne ja láide su su doaimmain nugo Norgga Gonagas. Divtte bálvalusaid maid son bargá álbmoga ja girku ovddas šaddat buressivdnádussan. Divtte min Gonagasa beassat eallit ovttas iežas álbmogiin friddjavuođas ja ráfis, du árbmugas gieđas.

Mii rohkadallat du, divttášit Gonagas Haralda hálddašit su alla gohččuma viisodagain ja vuoiggalaš mielain, ja ovddidit duohtavuođa ja rievtti du dáhtu ja álbmoga lágaid mielde. Bajásdoalau su iežat árkkalmastinvuođainat jus lossa beaivvit bohtet, ja leage don ieš su fápmun ja illun. Dan rohkadallat mii Jesusa nammii.”

Dasto loaiddastii Dronnet ovdan ja čippustii Gonagasa báldii. Gieđain Dronnega oaivvi alde rohkadalai bisma dán rohkosa:

”Buot iluid Ipmil, jorgal árpmut Dronnet Sonja beallái. Divtte su doaimma leat doarjjan Gonagasa daguide. Veahket su geavahit návccaidis ja fámuidis ávkin Norgga riikii ja olbmuide. Divtte buressivdnádusat ja ráfát deavdit su miela. Doala Dronnega badjin gievrras gieđainat, vai son álo gávdná doaivaga ja fámu du siste. Dan rohkadallat mii Jesusa nammii.”

Dasto logai bisma rohkosa sihke Gonagassii ja Dronnegii. Ja de son čippustii áltárii dan botta gonagaslávlla lávlojuvvui. Ja de čuoččahii bisma ja jorggihii Gonagasbára guvlui, geat ain leigga čippostallamin allaáltára ovddas. Son logai buressivdnádusa sudnuide:

”Min Hearrámet Jesus Kristus árbmu, Ipmila ráhkisvuohta ja Bassi Vuoiŋŋa servvolašvuohta lehkos dudno mielde. Amen.”

Sivdnádallanmátki

Sivdnádallama oktavuođas čađahii Gonagasbárra logi beaivásaš mátkki Lulli-Norggas. Ruovttoluotta Osloi čađahuvvui mátki GonagasskiippainNorga riddoguovlluid bokte. Jagi maŋŋel čađahii Gonagasbearaš 22-beaivásaš gonagasmátkki njealji davimus fylkkain .

Vierru čađahit guhkebuš mátkki stuora osiide riikkas sivdnádallama oktavuođas, vuolgá juo gaskaáiggi gonagasain. Sin ávvudedje iešguđetge dikkiin miehtá riika.