Dronnet Sonja doaibma

Go Majestehta Gonagas Haakon VIII čuovvolii Gonagas Haralda Norgga truvnnus borgemánu 28.beaivve 2026 šattai Majestehta Dronnet Mette-Marit riikka ođđa dronnet. Dronnet Sonja lei de deavdán Norgga njunušroavvá rolla 58 jagi - heajaid rájes 1968:s

Virggálaš doaimmat

Dronnet Sonjas leat ollu ja iešguđetlágan doaimmat, nugo mátkkit, galledeamit ja audienssat.

Dronnet Sonjai lea Šloahta kulturgaskkusteapmi dehálaš, nugo fálaldat gussiide sihke Šloahtas, Oscarshallas ja Dronnet Sonja DáiddaStáljas. DáiddaStállja rahppui Dronnega 80-jagi beaivve, gávcci mánu maŋŋel go Gonagas Harald suoli lei ordnen sutnje Šloahta stálja riegádanbeaivveskeaŋkan. Sutnje lea Šloahta ja eará opmodagaid áimmahuššan, divodeapmi ja ovdáneapmi dehálaš.

Riikka njunušroavván čuovui Dronnet Sonja dávjá Gonagas Haralda go lei stáhtagalledemiin olgoriikkas, ja son lei válddii vuostá olgoriikalaš stáhtaoaivámuččaid go ledje stáhtagalledeamis Norggas.Juohke jagi čađaheigga soai fylkkamátkki, ja dan mátkkis de galledeigga máŋga suohkana dan fylkkas.

Servodatáŋgiruššan

Dronnet Sonjas lea nanu servodatáŋgiruššan ja lea máŋgii leamaš gonagaslaš suodjaleaddjin stuorra akšuvnnain. Son lei mielde akšuvdnalávdegottis vuosttaš TV-ruhtačoagginakšuvnnas 1974:s mii lei ávkin Norgga báhtareddjiidráđđái, ja son doaimmai maiddái suodjaleaddjin ávvujagis 2024:s. Dronnet Sonja lei Norgga Rukses Ruossa várrepresideanta 1987 rájes 1990 rádjai. Jagis 1982 oaččui son Nansen- medállja ON:a báhtareddjiid allakommisearas su áŋgiruššama ovddas.

Dronnet Sonja searvá dávjá dehálaš doaluide maid organisašuvnnat geat barget sosiálaáššiiguin, lágidit. Ovdal juovllaid lea Dronnet Sonjas leamaš árbevierrun galledit sosiála doaimmaid ja ásahusaid mat dorjot mánáid, suojeheames nissonolbmuid, boarrásiid, ruovttuhis olbmuid ja gárrenávnnasgeavaheddjiid. Son berošta garrasit sisafárrennissoniid dilis Norggas ja lea máŋgii deaivvadan minoritehtanissoniid ovddasteddjiiguin sihke konferánssain ja seminárain, vuostáiváldimiin Gonagaslaš Šloahtas, ja galledemiid bokte iešguđet organisašuvnnain ja priváhta ruovttuin. Dronnet Sonja doaibmá MIRA-guovddáža suodjaleaddjin, mii lea resursaguovddáš nissonolbmuide geain lea unnitloguálbmoga duogáš.

Dronnet Sonjas lea maiddái stuora beroštupmi skuvlii ja oahpahussii. 2005:s vuolggahii son Dronnet Sonja skuvlabálkkašumi. Dát geigejuvvo juohke nuppi jagi skuvlii Norggas mii erenoamážit lea nagodan loktet ovttaárvosašvuođa ja fátmmasteami.
2023 rádjái lávii Dronnet Sonja ieš geiget dán skuvlavuoittu galledettiin vuoitoskuvlla. Jagis 2023 válddii dalá Ruvdnaprinsa Haakon badjelasas dán áŋgiruššama.

Dáidda ja kultuvra

Dronnet Sonjas leat olu beroštumiid maid náitá oktii su virggálaš doaimmaide. Sus lea hirbmat stuora beroštupmi dáidagii ja kultuvrii ja searvá kulturdoaluide ja čájáhusaide nu dávjá go vejolaš su prográmma ektui. Dronnet Sonja berošta maiddái kulturmuittuid suodjaleamis, lea Dološmuitosearvvi suodjaleaddji ja lea maiddái ožžon Norgga kulturárbbi gudnebálkkašumi 2015:s.

Jagis 2011 ásahii son Majestehta Dronnet Sonja dáiddárstipeandda ovddas Kjell Nupeniin, Ørnulf Opdahlain ja Ole Larseniin. Stipeanda juolluduvvui álggos davviriikalaš báberdáiddáriidda ovdal go 2014:s šattai internationálabálkkašupmin ja oaččui nama Queen Sonja Print Award.‌‍‌​​‌​‌​​​

Queen Sonja Print Award lea bálkkašupmi man ulbmilin lea oččodit beroštumi - ja ovddidit grafihkalaš dáidaga. Nu guhkás go diehtit, de lea dát stuorámus bálkkašupmi deaddilandáidaga suorggis.

Maŋemus jagiid lea Dronnet Sonja ieš maiddái hábmen grafihka ja bálseduoji, ja lea searvan olu čájáhusaide sihke Norggas ja olgoriikkas.

Musihkka lea sus eará stuora beroštupmi. Son lea Den norske Opera & Ballett, Oslo-Filharmonien, Oslo Kammermusikkfestival, FolkOrg, De unges orkesterforbund ja Elveruma Feastaspealuid suodjaleaddji.Son maid áŋgiruššá Dronnet Sonja lávlungilvvu oktavuođas, mii lágiduvvo Oslos juohke nuppi jagi. Gilvu geasuha erenoamáš čeahpes opera- ja klassihkalaš lávluid miehtá máilmmi. Dronnet Sonja čuovvu gilvvu ja geige ieš vuoittu vuittiide.