Gonagaslaš hoava jahkeraporta 2022

Oktii galgá Prinseassa deavdit rolla Norgga stáhtaoaivámužžan. Su válddálašvuođabeaivvi oktavuođas galledii Prinseassa sihke Stuorradikki, Ráđđehusa ja Alimusrievtti ja oasálasttii dasa lassin observatevran stáhtarađis Šloahtas. Rohttudávdda gáržžidemiid geažil ođđajagimánus, čađahuvvui ávvudeapmi easkka geassemánus. De ledje Ráđđehusa feastamállásat Deichmana váldogirjerádjosis ja Gonagasbára gállámállásat Šloahtas.

Go Norga fas rahppui pandemiija maŋŋel, besse Gonagasviesu miellahtut fas deaivvadit olbmuiguin miehta riikka. Jagis 2022 leat sii galledan 10 filkka ja 37 suohkana. Dasa lassin oasálaste sii máŋga čuođi ovttaskasdoaluin, ja lágidedje doaluid gussiide sihke Šloahtas ja Skaugumas. Internationála ovddastanmátkkiid Norgga olis fas sáhtii čađahit, ja manne earret eará Ruŧŧii, Danmárkui, Kalaallit nunaatii, USAi, Italiai ja Kenyai. Šloahtta maid viimmat beasai rahpat uvssaid oahpistangalledemiide, ja gávcci geassevahkus gallededje 43 000 olbmo Šloahta. Dasa lassin háliidedje badjel 20 000 olbmo vásihit Dronnet Sonja DáiddaStálja guovtti čájáhusa «Kongens biler» ja «Åpne dører».                                                                                                

Norggas leat Gonagasbárra, Ruvdnaprinsabárra ja Prinseassa Ingrid Alexandra Norgga Gonagasviesu mielahtut.  Sin lassin čađaha maiddái Prinseassa

Astrid, Ferner roavvá, muhtun almmolaš doaimmaid.  2022 skábmamánu, mearridii Prinseassa Märtha Louise ovttas Gonagasain ja lagamus bearrašiin ahte son dál ii šat galgga čađahit álmmolaš doaimmaid Gonagasviesu ovddas. Dáinna lágiin dáhttu son váikkuhit dasa ahte earru gaskal su ealáhusdoaimmaid ja  čanastupmi gonagasbearrašii, šaddá mihá čielgaseabbon.

Heahtedilit ja geopolitihkalaš dilli máilmmis ja Eurohpas leat váikkuhan maiddái Gonagasbearrašii diibmá.  Miehtá jagi leat sii oasálastán doaluin gos leat deaivvadan olbmuiguin geaidda Ukraina soahti čuohcá. Go Pride-doalut Oslos vásihedje terrorbáhčima geassemánus, de searvvai Gonagasviessu moraštan – ja muitolágidemiide.

Soahti ja heahtedili Eurohpas lea váikkuhan Norgii ja nu maiddái Gonagaslaš hoava doibmii.  Alla hattit, erenoamážit elrávdnjehattit- leat oalát rievdadan goluid gova. Doaibmabijuid bokte lea elrávdnjegolaheapmi Šloahtas unniduvvon sullii 10 proseantain dálvet, dasa lassin leat vuoruhan eará ládje ja seastán muhtun surggiin, ja de leat nagodaan 2022  liigegoluid gokčat.

Maŋemus jagiid lea čađahuvvon viiddis sihkarastinprošeakta gonagaslaš opmodagaid ektui, ja dat lea eanemusat guoskkahan objeavttaid sihkarastimii dáluin, opmodagain ja párkkain. Stuora oassi dáin doaimmain leat loahpahuvvon jagis 2022 ja 2023 mielde gárvvistuvvo loahpalaččat.  Barggut leat maŋiduvvon, ja gollorámma lea jagis 2022 loktejuvvon ođastuvvon prognosaid vuođul. Ođđa salderemis lea prošeavtta ođđa gollorámma loktejuvvon nu ahte ruhtaduvvo 800 miljonna ruvnnuin Barggut mat vel leat báhcán galget čađahuvvot ruhtademiin mii lea juolluduvvon stáhtabušeahtas.

Gonagaslaš civiliste jahkerehketdoallu čájeha 63,6 miljovnno ruvnna badjebáhcaga dán jagi juolludeami ektui. Sivvan badjebáhcagii lea ahte juolludeamit sihkkarvuođaprošektii álggos máksojuvvojit ja de daid goluiduhttá jagis 2023.  Gonagaslaš opmodagaid sihkkarvuođaprošeakta čájeha dan sivas 92,7 miljovnna ruvnno badjebáhcaga 2022 rehketdoalus. Gonagaslaš hoava doaibmarehketdoallu čájeha 27,17 miljovnna ruvnno vuollaibázan. Váldosivvan dasa lea ahte 31 miljovnna ruvnno leat sirdojuvvon Gonagaslaš hoava doaibmahearbeváris  sihkarastinprošektii gokčandihte osiid prošeavtta loktejuvvon gollorámmas.

Gonagaslaš hoava jahkeraporta oktan jahkemuitalusain 2022 ovddas, lea geigejuvvon Stuoradikki presideantagoddái, Gielda- ja guovlodepartementii ja Riikarevišuvdnii.