Hopp til hovedinnhold

Loahpaheapmi Oslos

Odne loahpaheigga Gonagaslaš Allavuohta Wales Prinsa ja Cornwall Hertuginne iežaska guossástallama Norggas. Ovttas Majestehtaguovttuin Gonagas Haraldiin ja Dronnegiin finaiga soai «Kongelige reiser» čájáhusas Kunstindustrimuseas.

22.03.2012

Wales Prinssas ledje ovdalaš seamma beaivvi čoahkkimat Norgga ealáhusaid ovddasteddjiiguin brihttalaš ambassadevrra resideanssas. Dan botta finaiga Dronnet Sonja ja Hertuginne Camilla Ullevål buhcciidviesu borasdávdaossodagas.

Borasdávdadikšun

Ullevål buhcciidviesus čájehedje Dronnegii ja Hertuginnii borasdávdaossodaga, masa gullá maiddái terapiija-ja aktivitehtaguovddáš. Soai beasaiga maid gullat movt sii doppe barget.

Cornwall Hertuginne lea gidden stuora beroštumi áššiide mat gusket borasdávdii, son lea earet eará Maggieguovddážiid suodjaleaddji. «Maggie’s» bargun lea ásahit fuolaheddjiidguovddážiidda fierpmádaga, dakkár guovddážiidda gos fállet divššu ja doarjaga pasieanttaide ja sin lagamuččaide, sihke buohcanáiggis ja maiddái maŋŋil.

Maggieguovddážat geahččalit fállat sihke eksepšunealla fuolahusa ja eksepšunealla designa, ja Norgga arkitektkantuvra Snøhetta lea ožžon bargun hukset Maggieguovddáža Aberdeenas. Dronnet ja Hertuginne jotkkiiga guossástallama ja sudnos lei čoahkkin Snøhetta arkiteavttaiguin, ja beasaiga singuin ságastallat Norgga-brihttalaš ovttasbarggu birra borasdávdaguovddáža oktavuođas.

Kunstindustrimusea

Brihttalaš guossástallan loahpahuvvui Kunstindustrimuseas Oslos. Fárrolaga Gonagasain ja Dronnegiin finaiga Prinsa Charles ja Hertuginne Camilla geahččamin čájáhusa “Den kongelige reise 1905 – 2005. Diet čájáhus lea oassi Ráđđehusa skeaŋkkas maid attii Gonagasbárrii sudno 75-jagi ávvudanskeaŋkan.

Odne giddejuvvui diehttelas eanemus beroštupmi čájáhusa «brihttalaš oassái», mas oalle čielgasit oaidná man lagas čanastat leamaš brihttalaš ja Norgga gonagasbearrašiid gaskkas. Das oaidná historjjá mii muitala sihke eŋgelas Prinseassa Maud birra gii šattai Norgga Dronnegin, ja maiddái oaidná Gonagas Haakon ja Ruvdnaprinsa Olav go leigga báhtaran Londonii 2.mailmmisoađi áiggi, ja movt soai doppe jođiheigga Norgga eksiilaráđđehusa.


Wales Prinsa ja Cornwall Hertuginne mátkkošteaba viidáseappot Ruŧŧii ja Danmárkui go dáppe vuolgiba.

 

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas