Hopp til hovedinnhold

Loahpaheigga Mearraolbmuid girkus

Majestehtat Gonagas Harald ja Dronnet Sonja loahpaheigga odne iežaska USA guossástallanmátkki. Mátki loahpahuvvui go soai finadeigga Norgga Mearraolbmuid girkus New Yorkas.

22.10.2011

New York Norgga Mearraolbmuid girku rahppojuvvui 1878:s, ja dat lea dehálaš čoaggananbáiki sihke daid norgalaččaide geat ásset doppe, ja maiddái Norgga mearraolbmuide geat bisánit dohko oanehit áigái. Mearraolbmuid girkus lea mávssolaš sosiála doaibma, dasa lassin go doaimmaha oskkolaš seremoniijaid nugo ipmilbálvalusaid, vihahemiid, gásttašemiid ja konfirmašuvnnaid. Dohko čoahkkanit norgalaččat juohke vahku, boradit Norgga biepmuid ja lohkat dárogiel aviissaid. Girku lágida maid konsearttaid ja logaldallamiid, ja doppe lea maid girku iežas dáiddagalleriija, the Trygve Lie Gallery.
 

Lei pastor Stave Engdal gii doalai otná ipmilbálvalusa. Maŋŋel ipmilbálvalusa čájehedje Gonagassii ja Dronnegii galleriija, doppe leat Norgga ja amerihká dáiddáriid duojit čájáhusas. Máŋggas sis ledje ieža doppe odne go Gonagasbárra lei dáiddačájáhusa geahčadeamen.
 

Norgii fas

Ipmilbálvalus ja guossástallan Mearraolbmuid girkus loahpahii Gonagasbára logi beaivásaš mátkki USA Gaskaoarjeguovllus ja New Yorkas. Soai leaba fitnan ollu norgalaš-amerihkálaš birrasiin ja deaivvadan sin organisašuvnnaiguin sihke Iowas ja Minnesotas –mat leat daid norgalaččaid «guovddášguovllut» geat fárrejedje USA:ii 1800 ja1900-logus. Duogáš guossástallamii lei the American Scandinavian Foundations 100-jagi ávvudeapmi, lágideapmi mii lei ikte eahkes.

 

Dalá Ruvdnaprinsa Olav ja Ruvdnaprinseassa Märtha čađaheigga guhkit USA mátkki 1939:s. Dás oaidnit go soai nammaduvvoba Honorary Native Americans ja leaba mielde miessemánu 17.beaivvi ávvudeamis (Fuom: Ii leat jietna) (Govva: Felix Thumblom, Gonagaslaš hoava govvavuorkkás)

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas