2010 jahkedieđáhus

2010 jahkedieđáhusas leat Gonagaslaš civilliste, Gonagaslaš Allavuođaguovtto Ruvdnaprinssa ja Ruvdnaprinseassa bargoveaga ja Rabas Šloahta rehketdoalut. Dat sisttisdoallá maid organisašuvdnačilgehusa, almmolaš prográmma ja čilge maid Gonagasviessu lea čađahan ja Gonagaslaš hoava doaimmaid.

Gonagaslaš civilliste rehketdoallu lea gárvvistuvvon 285 097 ruvnno vuolláibáhcagiin. Vuolláibáza gokčojuvvo ovdalaččas sirrejuvvon ruđain. Gonagaslaš Allavuođaguovtto Ruvdnaprinssa ja Ruvdnaprinseassa bargoveaga rehketdoalus lea 839 915 ruvdno buorrin – dien submis lea fárus 600 000 ruvdno mii galgá sirrejuvvon plánejuvvon biilaoastimiidda. Rabas Šloahta rehketdoalus lea 46 313 ruvnno vuolláibáza, maid iežaskapitálain galgá gokčat.

Dárkileappot almmolaš prográmma birra

Majestehta Gonagasas leat leamaš 158 audieanssa jagis 2010 ja leat leamaš 27 Allaáiggalaš audieanssa gos amas riikkaid ođđa ambassadørat Norgii lea buktán iežaset akkreditiivvaid. Jagi 2010 mielde lea Majestehta Gonagas leamaš mielde 160 almmolaš doaluin Norggas ja olgoriikkain, Majestehta Dronnet lea leamaš mielde 154 almmolaš doaluin, Gonagaslaš Allavuohta Ruvdnaprinsa lea leamaš mielde 219 almmolaš doaluin ja Gonagaslaš Allavuohta Ruvdnaprinseassa lea leamaš mielde 139 almmolaš doaluin.

Oktiibuot leat sii guossástallan 47 suohkana ja 17 fylkka, ja sis leamas 25 mátkki olgoeatnamiidda. Gonagasbárra finai fylkamátkkis Opplánddas geassemánus, ja Ruvdnaprinsabárra finai fylkamátkkis Aust-Agderis borgemánus/čakčamánus.

Majestehtaguovttos Gonagas ja Dronnet čađaheigga stáhtaguossástallama Slovakias golggotmánus, ja doppe lei golmmabeaivásaš viiddis prográmma. Gonagaslaš Allavuođaguovttos Ruvdnaprinsa ja Ruvdnaprinseassa leigga gis njealjebeaivásaš almmolaš guossástallamis Malaysias njukčamánus.

Bearráigeahččan ja ođasmahttimat

Stuora oassi juolluduvvon doarjagiin lea geavahuvvon Šloahta, Bygdø Gonagasgárdima váldoviesu ja Oscarshall bearráigeahččamii ja ođasmahttenbargguide, dasa gullet maid dat kultuvrralaš ja historjjálaš árvodávvirat mat doppe leat. Šloahta Stuora boradansála divodanbarggut loahpahuvvo cuoŋománus 2010. Rabas Šloahtta čađahii vuosttaš olles čájehanáiggi Oscarshallas maŋŋá go doppe leat máŋga jagi bargan ođasmahttendoaimmaiguin.

Čállojuvvo jahkásaš raporta mas čilgejuvvo movt Stuoradikki juolludeamit Gonagaslaš hovvii (Civillisten) ja Gonagaslaš Allavuođaguovtto Ruvdnaprinssa ja Ruvdnaprinseassa bargovehkii leat geavahuvvon (almmolaš bušeahtta). Majestehtaguovtto Gonagasa ja Dronnega ja Gonagaslaš Allavuođaguovtto Ruvdnaprinssa ja Ruvdnaprinseassa apanasje galgá gokčat priváhta opmodagaid hálddašeami, jođiheami, divodemiid ja ođasmahttenbargguid (FDVU). Mearriduvvon oassi apanasjes gokča priváhta goluid, nugo almmolaš bivttasteami.

Dan dihte go stáhta ii doala viesu Gonagaslaš Allavuođaguktui Ruvdnaprinsii ja Ruvdnaprinsessii, de adnojuvvo oassi apanasjejuolludemiin Skaugum váldoviesu hálddašeapmái, jođiheapmái, bearráigeahččamii ja ođasmahttemii. Ruvdnaprinsabára apanasje lei diibmá oktiibuot 7 515 000 ruvnno. Dain ruđain geavahuvvui sullii 6 645 000 ruvdno FDVU-ulbmiliidda.