Čuoigan-ja njuiken Máilmmimeasttirgilvvut (MM) álgán

Eanet go 1700 máná Oslos skuvllain álggahedje rahpandilálašvuođa. Gonagasa Garde láidestii mánáid Šloahttašiljus, Šloahttamiellis vulos Universitehtašilljui, ja mánát gudde buot daid našuvnnaid leavggaid main leat oassálastit Máilmmimeasttirgilvvuin.

Svein Aaser, MM ovdaolmmoš, álggahii ja dasto rabai FIS-presideanta, Gianfranco Kasper gilvvuid almmolaččat. Sátnejođiheaddji Fabian Stang giitii earenoamážit mánáid: – Din dihte mii lágidit MM-gilvvuid, ja din dihte mii leat huksen Holmenkollena, logai Oslo-sátnejođiheaddji, ja dáhtui buohkaid hávskkohallat boahttevaš beivviid.

Boahtte oktanuppelohkái beaivvi galget 50 našuvnna gilvaleaddjit gilvvohallat 21 iešguđetlágan gilvvuin Holmenkollenis. Gonagas Harald čuovvu gilvvuid juohke beaivvi, ja su fárus dáidet eanas áiggi leat maiddái earát Gonagasbearrašis. Ruvdnaprinsa Haakon lea Máilmmimeasttirgilvvuid váldolávdegotti lahttu, son áigu čuovvut ollu gilvvohallamiid ja maiddái fitnat gilvvohallanlágideami rusttegiid geahččame.

Kultuvra guovddážis

Čađat dan áiggi go Máilmmimeasttirgilvvut leat, lágiduvvojit iešguđetlágan doalut Oslo gávpotguovddážis. Medáljajuohkin dáhpáhuvvá Universitehtašiljus juohke eahket, ja dan ovdál lágiduvvojit konsearttat ja kulturdoalut. Spikersuppas, nuppe bealde Karl Johan gáhta, leat ceggejuvvon buvddat gos olbmot besset oastit borramuša ja juhkamuša.

Dasa lassin leat maŋemus beivviid ceggejuvvon gávcci jiekŋaskulptuvrra:

Munch muohttagis ja jieŋas

Karl Johan gáhta guoras leat viđa riikka jiekŋadáiddára ráhkadan jiekŋaskulptuvrraid maidda leat inspirašuvnna viežžan Edvard Munch maleriijaid motiivvain. Daid beivviid leat Spikersuppai fievrredan 500 tonna muohttaga ja 45 kubihka jieŋa, ja dain leat hábmen earet eará "Skrik", "Syk pike" ja "Aften på Karl Johan". Šloahttamiellái lea ráhkaduvvon 15 metter guhkkosaš ”Pikene på broen” skulptuvra.

Feastamállásat

Eahkes leat Gonagas Harald ja Dronnet Sonja, Ruvdnaprinsa Haakon ja Ruvdnaprinseassa Mette-Marit guossin Ráđđeviesus, gosa Oslo sátnejođiheaddji Fabian Stang lea bovden Máilmmimeasttirgilvvuid rahpanmállásiidda.