Hopp til hovedinnhold

Juovladearvvuođat Kruvnnaprinssabearrašis

Kruvnnaprinssa bearáš lea leamašan mátkkis skábmamánu loahpa rájes. Sikkim báikkis nuortadavvi Indias sii deaivvadedje NRK joavkkuin, ja leat sádden ruoktot juovladearvvuođaid filmmain ja govaiguin.
23.12.2010

Mátki álggi Istanbulas, gos finadedje earret eará Hagia Sofias – mii oktii lei okta máilmmi fámoleamos girkuin, ovdal go dat šattai moskéa maŋŋil go turkalaččat jođihišgohte Konstantinopela. Odne lea Hagia Sofia dávvirvuorká.

Kruvnnaprinssabearaš finadedje maiddái Ammanas Jordanas, ovdal go vulge nuortas Indiai. Indias sii leat fitnan earret eará Jodphuras Rajastanas ja Dzongus Sikkimas.

Dzongu birra

Dzongu lea leahki lahka Himalaya vári man davimus rádji lea Tibet guvlui, oarjerádji Nepala ja nuortarádji ges Bhutan guvlui. Dát lea suodjaluvvon guovlu lepcha álgoálbmoga várás, ja guovllus eai sáhte earát go lepcha-olbmot oamastit eatnamiid.

Dzongus orrot sullii 7000 olbmo. Luondduruovttudoallu lea guovllu dovdomearkan, ja guovllu olbmot birgejit dainna maid ieža gilvet. Maŋimus jagiid lea guvlui láhččojuvvon elektrisitehta ja telefovdna.

Jus galgá mátkkoštit Dzongui de dasa dárbbaša sierralobi, ja lea dušše soames jagi dás ovdal ahte turisttat besse guvlui. Dáppe eai gávdno hoteallat, muhto soames bearrašat leat ruovttuideaset rahpan "homestay" báikin, gos mátkkošteaddjit sáhttet orrut ovttas bearrašiiguin.

Homestay

Kruvnnaprinssabearas orui Mayal Lyang Homestay:s, Gyatso Tongden Lepcha ja su bearraša luhtte Passingdang gilážis. Doppe sii borre árbevirolaš borramušaid ja orro nu movt guovllu olbmot dahket.

Kruvnnaprinssa bearáš lea leamašan mátkkis skábmamánu loahpa rájes. Sikkim báikkis nuortadavvi Indias sii deaivvadedje NRK joavkkuin, ja leat sádden ruoktot juovladearvvuođaid filmmain ja govaiguin (Govva: NRK)

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas