Hopp til hovedinnhold

Stáhtaguossis Slovakias

Majestehtaguovttos Gonagas ja Dronnet álggaheigga odne stáhtaguossástallama Slovakia republihkas. Lea vuosttaš geardi go Norggas leat ovddasteaddjit stáhtaguossin Slovakias dan rájes go dát riika šattai sierra riikan 1993:s.

26.10.2010

Allaáiggálaš buresboahtinseremoniija lei eske ovdalgaskabeaivvi, go H.E. Presideanta Ivan Gašparovič ja su roavvá Silvia Gašparovičová sávaiga Gonagasbárrii buresboahtima árbevieru mielde: Láibbiin ja sálttiin. Gonagas Harald ja Presideanta Gašparovič dearvvaheigga leavgga ja gudnigárdena ovdal go presenteregohte almmolaš sáttagottiid.

Almmolaš čoahkkimat

Maŋŋá buresboahtinseremoniija jođiheigga Gonagas ja Presideanta ságastallamiid gaskal norgga ja slovakia ovddasteddjiid. Sáttagottit divaštalle earet eará nanu ovdáneami ja eanet movt olahit eanet ovttasbarggu ealáhusain ja kultuvrra oktavuođas. Stáhtaministtar Iveta Radičová guossohii almmolaš lunšša Ráđđehusviesus, ja dan maŋŋá lei Gonagas Haraldis čoahkkin parlameantta presideanttain Richard Sulík.

Danubiana dáiddaguovddáš

Dronnet Sonja finadii Danubiana Meulensteen dáiddaguovddážis. Guovddáš lea muhtun njárggas Donau eanus (danin diet namma) lahka Ungarn ráji, ja doppe lea dál čájáhus gos čájehit slovakia dáiddára Jozef Jankovič bargguid.

Guovddážis lea earenoamáš arkitektuvra, lea hábmejuvvon dego romalaš gallei – ja dan birra lea skulptuvrapárka. Dronnet beasai maid vázzit skulptuvrapárkkas oahpisteddjiin ja beasai dan birra gullat.

Maŋŋá dan guossástallama lei Dronnet Silvia Gašparovičovás guossin almmolaš lunššas Erdödypalássas. Palássas lea maid dáiddagalleriija, ja Dronnet beasai maiddái dan oaidnit ja gullat dan birra.

Bratislava boares gávpot

Bratislava šattai gávpogin 1291:s ja lei Ungarn oaivegávpot gaskal 1536 ja 1784. Jagis 1919 šattai gávpot oassin Tsjekkoslovakiai. Bratislava lei oaivegávpot dalle go Slovakia bággehalai šaddat duiskavuollásaš riikan gaskal 1939 ja 1945, ovdal go šattai oassin Tsjekkoslovakiai. Gávpot šattai fas oaivegávpot go Slovakia šattai sierra iešmearrideadji riikan 1993:s.

Bratislavas lea hui olles ja bures várjaluvvon boares gávpotoassi, gos leat eatnat historjjálaš visttit ja dehálaš institušuvnnat. Oahpisteaddjit čájehedje Gonagasbárrii boares gávpoga, ja sudno fárus lei maid Bratislava sátnejođiheaddji, Andrej Ďurkovský.

Gallamállásat

Eahkes leigga Gonagas ja Dronnet presideantabára guossit gallamállásiin boares parlameantavisttis. Mállásat ledje Stuorasálas, gos ovdal earet eará lávejedje lágidit konsearttain. Sihke Frantz Lizt ja Johannes Brahms leaba doallan doppe konsearttaid.

Fáktadieđut

Faktadieđut Republihka Slovakia birra

Oaivegávpot: Bratislava
Stuorámus gávpogat: Bratislava, Kosice ja Presov

Viidodat: 49 035 km²
Olmmošlohku 2010: sullii 5,4 millioner
Almmolaš giella: Slovakiagiella

Stivren: Republihkka
Stáhtaoaivámuš 2010: Presideanta Ivan Gašparovič

Slovakias leat leamaš diplomáhtalaš oktavuođat Norggain ođđajagimánu 1. beaivvi rájes 1993, go Slovakia luovvanii ovddešTsjekkoslovakias.

Eai leamaš nu beare ollu ovttasdoaimmat gaskal Norgga ja Slovakia, muhto dál leat ovttasbargagoahtán eanet kultuvra-ja ealáhussurggiin. Dat vuolgá earet eará das go Norga veahkeha Slovakia EØS-ruhtadanortnega oktavuođas ja go Norga ásahii ambassáda Bratislavai ođđajagimánus 2005.


Gáldo: OD

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas