Njuike váldosisdollui

Foandda juolludeamit 2010

Ruvdnaprinsabára Humanitære Foandda stivra lea dán jagi mearridan doarjut prošeavtta ”Ungt entreprenørskap” – mii lea Strømmestiftelsen ja Misjonsalliansen oktasaš prošeakta.

12.08.2010

Foanddas juolluduvvo doarjja njuolga nuoraidprošeavttaide Strømmestiftelsena Shonglap doibmii ja Misjonsalliansen Jovenes emprendedores doibmii.

Doarjagat juogaduvvojedje mánnodaga borgemánu 30.beaivvi dan oktavuođas go lágiduvvui fágaseminára mikrokredihta ja nuorra ásaheaddjidoaimmaid birra Agder Universitehtas Kristiansánddas.

Nuorra ásaheaddjidoaimmaid ovttasbargoprošeakta

1 milliárda olbmot máilmmis leat nuorat gaskal 15 ja 23 jagi. Stuora oassi máilmmi veahkehanprošeavttain čalmmustahttet mánáid ja bearrašiid, muhto hárve barget njuolgut nuoraide veahkkin.

Danin leat ge mearridan addit Foandda 2010 doarjagiid njuolga nuoraidprošeavttaide Shonglap Bangladeshas ja Jovenes emprendedores doibmii Ecuadoras. Strømmestiftelsen ja Misjonsalliansen leat searválaga bargan ja lonohallan vásáhusaid ahte movt veahkehit geafes riikkaid nuoraid ásahit sin iežaset ealáhusdoaimmaid.

Ruvdnaprinsabára Humanitære Foandda juolludeamit leat 300 000 kruvnno goappáge prošektii. Dán jagi lea logát geardde go foanddas juogaduvvojit doarjaga.

Shonglap

Strømmestiftelsen Shonglap-prográmma Bangladeshas lea jahkásaš oahpahus náitalkeahtes nieiddaide geat leat gaskal 11 ja 19 jagi, geat geafivuođa geažil eai leat beassan skuvlla vázzit. Shonglap lea bengali giella ja mearkkaša gaskaneaskka ságastallan.

Ulbmil lea veahkehit nieiddaid duostat iešheanalaččat bargat, ja oahpahit sidjiide sin iežaset vuoigatvuođaid birra ja makkár vejolašvuođat sis leat ieža dinet ruđa. Nie sii sáhttet beassat beare nuorran náitaleamis, bággoprostitušuvnnas ja ahte earát sin geavahit. Go leat čađahan olles kursse, de ožžot boarraseamos nieiddat vejolašvuođa oažžut loana vai besset ásahit iežaset ealáhusdoaimma.

Dán rádjái leat 40.000 nieidda čađahan prográmma.

Jovenes emprendedores

Jovenes emprendedore mearkkaša nuorra fuomášeaddjit ja dat lea ođđa prošeakta mas sáhttá oažžut loana ja seammás oažžut oahpu. Dat lea nuoraide gaskal 17 ja 23 jagi geat ellet stuora gávpot heajos diliin Guayaquilas Ecuadoras. Ulbmil lea veahkehit nuoraid gávdnat alcceseaset eallinláibbi ja dan láhkái geahpedit váhnemiid máksinnoađi, ja buot deháleamos lea ahte oahpahit nuoraid árrat juo barggu háhkat. Dat geahpeda sosiála váttisvuođaid ja addá nuoraide buoret iešvuođadovddu.

Prošeavtta sisdoallu lea oahppu man ulbmil lea veahkehit nuoraid gávdnat makkár ealáhusdoaimmaid sii sáhtáše ásahit, ja seammás oahpahit mii gáibiduvvo go galgá lihkostuvvat ásahanjurdagiin. Dat nuorat geat sáhttet ovdanbuktit buriid fitnodatjurdagiid, sáhttet oažžut loana ja veahki ásahit iežaset ealáhusdoaimma.

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas