Hopp til hovedinnhold

Loahppaguossástallan Bergenis

Majestehta Dronnet Beatrix loahpahii iežas golmmabeaivásaš stáhtaguossástallama Bergenis duorastaga. Majestehtaguovttos Gonagas Harald ja Dronnet Sonja čuovuiga nederlándda Dronnega go son lei hansagávpogis guossin.

04.06.2010

Norggas ja Nederlánddas lea ollu mii lea oktasaš, ja dán guovtti riikkas lea áigá juo leamaš gávppašansuorggis ovttasbargu. Sártnistis maid Gonagas Harald doalai gállamállásiin, distaga, muittašii son man viiddis muorragálvogávppašeapmi lei 1600-logus, ja leaikkastallamiin logai son ahte Amsterdam gávpoga leat huksen norgga dimbariiguin.

Duiska hansasearvvis ledje gávpestašuvnnat máŋgga sajes Norggas, muhto ovddemustá Bergenis, dasa lea Bryggen duođaštussan. Nederlándalaččat soite lean hansalaččaid garraseamos gilvaleaddji. Duorastaga beasai Dronnet Beatrix čuovvut historjjálaš mátki maid girječálli Gunnar Staalesen lágidii. Dronnega mieldečuovvut leigga Gonagas Harald ja Dronnet Sonja. Mátki loahpahuvvui riddováktafatnasis "Bergen".

Konferánsa nanu guolásteami birra

K/V Bergen fatnasis besse Dronnet Beatrix, Gonagas ja Dronnet leat mielde birrabeavddikonferánssas nanu guolástanfitnodagaid birra. Lei Áhpedutkaninstituhtta mii lágidii konferánssa, gosa ledje čoahkkanan dutkit ja guolásteaddjit lonohallat dieđuid ja digaštallat.

Norggas ja Nederlánddas lea seamma stuora beroštupmi dasa ahte Davvimeara áhperiggodagaid galgá buoremus lági mielde hálddašit, ja lea dárbu oažžut eanet dieđuid ábi iešguđetlágán šattuid ja elliid birra ja movt dat birgejit ovttas. Diekkár dieđuide lea dárbu go galgá sihkkarastit dakkár hálddašeami maid ekovuogádat gierdá.

Stáhtaguossástallama oktavuođas lágiduvvui maid stuora ealáhuskonferánsa Áhpedutkaninstituhtas, gos digaštalle nanu ja guoddi doahpaga sisdoalu dárkileappot.

Konsearta Troldhaugenis

Fløibana doalvvui gonagaslaš gussiid Fløienii, gos Bergena sátnejođiheaddji, Gunnar Bakke, lei almmolaš lunša guossoheaddji. Dasto mátkkoštedje guossit viidáseappot Edvard Grieg ruktui Troldhaugenii, gos pianočuojaheaddji Audun Kayser čuojahiii sidjiide.

Troldhaugen guossástallan lei maŋŋemus oassi Dronnet Dronning Beatrix guossástallamis. Das vulggii Dronnet Bergen girdihámmánii Fleslandii gos son manai girdi mielde Amsterdamii.

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas