Hopp til hovedinnhold

Stáhtaguossit Nederlánddas

Majestehta Gonagas sávai eske ovdalgaskabeaivvi buresboahtima Nederlándda Majestehtii Dronnet Beatrixii Norgii. Dronnet Beatrix lea golmmabeaivásaš stáhtaguossástallamis Norggas, ja su vuostáiválde allaáiggalaš buresboahtinseremoniain go son bođii Osloi.
01.06.2010

Dronnet Beatrix bođii Oslo Hámmanii Tromp fregáhtain. Ruvdnaprinsa Haakon vuostáiválddii fregáhta Kongesjaluppeniin, ja son láidii Dronnega Honnørbryggai, mii lea Oslo Ráđđeviessu lahka. Das vuostáiválde su Gonagas Harald, Dronnet Sonja ja Ruvdnaprinseassa Mette-Marit.

Álggos čuojahedje Nederlándda našunálalávlaga ja dan maŋŋil fas ”Ja, vi elsker”. Dasto inspiserii Dronnet Beatrix æresgardena ja Gonagas dearvvahii Dronnegiin almmolaš Norgga ovddasteddjiid. Lei maid vejolašvuohta beassat dearvvahit nederlándalaččaid mat leat Norggas ja maiddái skuvlamánát ledje boahtán dohko.

Kránsabidjan Akershusas

Árbevierru lea ahte stáhtaoaivámuččat mat bohtet Norgii almmolaš guossin, bidjet kránssa našunálmonumeantta lusa. Gonagas Harald láidii Dronnet Beatrix monumeantta lusa mii lea Akershus festning báikkis, ja dasa son luittii kránssa muitun norgalaččaide geat gahčče 2.máilmmisoađis. Maŋŋel kránsabidjama mátkkoštii Dronnet Beatrix Stuoradiggái gos sus lei čoahkkin Stuoradiggepresideanttain Dag Terje Andersen.

Gállamállásat

Odne eahkes diibmu 20:00 leat gállamállásat Gonagaslaš šloahtas gudnin Dronnet Beatrixii. Guossoheaddjit leaba Gonagas Harald ja Dronnet Sonja, ja maiddái Ruvdnaprinsabárra, Prinseassa Märtha Louise ja Ari Behn, ja Prinseassa Astrid, Ferner roavvá galget leat doppe. Gonagas Haralda ja Dronning Beatrix sártnit almmuhuvvojit eahkeda mielde.

Ihttá prográmma

Ihttin galgaba Gonagas Harald ja Dronnet Sonja čuovvut Dronnet Beatrixa, álggos Oslo Børsii, gos galget čuovvut dásseárvoseminára ”Labour participation and Gender”, dasto mannet sii viidáseappot Bjørnholt skuvlii, gos leat bargan mearkkašahtti buori barggu searváidahttima oktavuođas. Ráđđehus bovde almmolaš lunšii Akershus šloahtas, ja dan maŋŋil deaivvada Gonagas ja dat guokte dronnega norgga ja nederlándda ealáhusovddasteddjiiguin. Dronnet Beatrix galgá maid deaivvadit nederlándalaččaiguin mat leat Norgga, dat dilálašvuohta lea Oslo Ráđđeviesus.

Eahkes galget Gonagasbárra, Ruvdnaprinsabárra, Prinseassa Märtha Lousie ja Ari Behn, ja Prinseassa Astrid, Ferner roavvá leat Dronnet Beatrix guossit kulturlágideamis Operaviesus.

Majestehta Gonagas sávai eske ovdalgaskabeaivvi buresboahtima Nederlándda Majestehtii Dronnet Beatrixii Norgii (Govva: Liv Osmundsen og Ida Fjeldbraaten, Gonagaslaš hoavva)

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas