Hopp til hovedinnhold

Menuhin-gálla i Operaviesus

Gonagas Majestehta lei odne eahket gállakonsearttas Operaviesus. Konsearta lei nuorra fioliidnačuojaheddjiid allaárvosaš Menuhin gilvvu loahpahanlágideapmi, ja lei Gonagas Harald gii attii bálkášumi dan guoktái geat vuittiiga.

24.04.2010

Gilvu lea lágiduvvon máŋga beaivvi ja das leamaš guokte luohká: Vuollel 16 jahkásaš nuorat ja boarraseappot geat leat vuollel 22 jagi. 42 gilvaleaddji leat čuojahan guhtege okto, sii leat čuojahan stuora orkesteris, čuojahan gámmirmusihka ja maiddái čuojahan musihka maid ieža leat ráhkadan.

Loahpas lei Canada Kerson Leong gii vuittii nuoraid luohká ja Xiang Yu, gii lea Kiinnas eret vuittii boarraseappuid luohká. Norgga Guro Kleven Hagen oaččui EMCY rámádusa. EMCY lea nuoraid musihkkagilvvuid eurohpálaš ovttastus.

Gonagas Harald attii vuoittuid vuoitiguoktái Kerson Leong ja Xiang Yu gállakonsearttas Operaviesus ikte.

Gállakonsearta

Dat mii lea earenoamáš Menuhin-gilvvus, lea ahte lágiduvvojit ollu konsearttat dan áiggis go gilvu lea. Doppe čuojahit dovddus musihkárat, sin searvvis maiddái jury lahtut ja ovdalaš Menuhin-vuoitit. Otná eahkeda gállakonsearttas čuojahedje sihke Alexander Rybak, Arve Tellefsen ja Oslo-Filharmonia, ja diehttelas maiddái dán jagi vuoitiguovttos.

Oslo 2010

Lei fioliidna čuojaheaddji Yehudi Menuhin gii vuođđudii dán gilvvu 1983:s. Dat lágiduvvo juohke nuppi jagi, ja lei vuosttaš geardi go dát gilvu lágiduvvui olggobealde Frankriikka ja Stuorabrittánia. Gilvvu dáiddalaš jođiheaddji Gordon Back muitala ahte sivvan dasa manne sii dán jagi válljejedje Norgga, lea sihke dat ahte dáppe leat buorit birrasat lágideapmái, nanu ja ealli musihkkabiras ja maiddái dat ahte Norga dán jagi čalmmustahttá min iežamet fioliidnačuojaheaddji ja komponistta, Ole Bull 200 jagi ávvudeami.

Olles vihtta fioliidnačuojaheaddji Norggas ledje válljejuvvuon dán jagi 42 gilvaleddjid searvái.

2010 gilvu lea ovttasbargu gaskal vihtta musihkkaorganisašuvnna Norggas: Barratt Due musihkkainstituhtta, Den Norske Opera & Ballett, Oslo-Filharmonien, Norgga kulturskuvlaráđđi ja Norgga musihkkaallaskuvla.

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas