Rabai Finnmárkovuodjima

Dan logai Gonagaslaš Allavuohta Ruvdnaprinsa go son rabai 30. Finnmárkovuodjimiid eske iđitbeaivvi. Oktiibuot 108 beanaráiddu leat mielde dán jagi beanavuodjimiin.

Rahpansártnistis buvttii Ruvdnaprinsa Haakon dearvvuođaid Gonagaslaš Allavuođas Ruvdnaprinseassas gii galggai rahpat dán 1000 kilomehter guhkkosaš beanavuodjinmátkki.

- Ruvdnaprinseassa lei hui mielas áigon deike vuolgit, ja son šallošii sakka go ii dette sáhttán vuolgit – danin go son lea bávččagahttán niskki. Son lei vel smiehttan oahpahallat vuodjit beatnagiiguin vai ieš oahpašii vuodjit. Muhto go gearddi manai nugo manai, de lean ilus go mun ožžon vejolašvuođa boahtit su ovddas deike, logai Ruvdnaprinsa.

Vujii beatnagiiguin

Almmolaš rahpan dilálašvuohta lágiduvvui dan láhkái ahte Ruvdnaprinsa čuohpastii vuolginbátti gaskat ja luittii vuosttaš beanaráiddu mátkkái. Duháhiid mielde olbmot ledje boahtán Álttá márkanbáikái muosáhit rahpandilálašvuođa čáppa beaivvádahkan. Ruvdnaprinsa čuovui ieš vuosttaš oasi mátkkis Álttás Sorrisnivai Lars Monsen fárus. Eanas oasi mátkkis doaladii Ruvdnaprinsa beanaráidduin. (geahča Ruvdnaprinssa ja Lars Monsen videofilmma dien mátkkis YouTube neahttabáikkis). Sullii diimmu ádjáneigga soai vuodjit Sorrisnivai, ja doppe válddii Ruvdnaprinsa Haakon earu Monseniin ja su beatnagiiguin.

Sorrisnivas beasai Ruvdnaprinsa geahčadit Jiekŋahotealla, ovdal go Álttá sátnejođiheaddji Geir Ove Bakken bovdii su lunsj borramušaide.

SISA

Veaigin lávvordaga finadii Ruvdnaprinsa SISA kultuvrralaš guovddážis ja Gnisten kaféas. Doppe lei girjás ja máŋggabealát prográmma mii čájehii ollu dain bargguin maid guovddážis doaimmahit. Guossohedje maid álkis borramušaid maid ledje ráhkadan borramušráhkadangirjji «Kokebok for ekstremt fattige – når trygda ikke strekker til» neavvagiid mielde. Koahkka, gii maiddái lea okta girječálliin, Karl Helge Vannebo muitalii man ollu vejolašvuođat olbmos aŋkke leat ráhkadit borramušaid vaikko lea ge vánis ruhta.

Guossástallan Álttás loahpahuvvui Nuoraidviesus, gos gávpoga nuorat muitaledje ja čájehedje Ruvdnaprinsii man máŋggalágán fálaldagat Álttá nuorain leat. Suohkan čájeha nuoraide stuora beroštumi, ja lea addán 200 čoavddagoartta nuoraide, vai sii sáhttet geavahit vistti juste dalle go ieža hálidit.

Ruvdnaprinsa beasai muosáhit sihke dánssa ja rockekonseartta ja beasai maid humadit nuoraiguin geat ledje boahtán Nuoraidvissui dán lávvordatveaiggi.