Ráfibálkášumičájáhus Cape Townas

Cape Town lea Lulli-Afrihkká nubbin stuorámus gávpot ja lea riikkaidgaskasaččat dovddus danin go doppe lea earenoamáš hámmán ja beakkán eanadovdomearkkat nugo Table Mountain ja Cape Point.

Gonagas ja Dronnet deaivvadeigga ráfibálkášumi vuitiiguin Desmond Tutu, Frederik Willem de Klerk ja Nelson Mandela ja Albert Luthuli ovddasteddjiiguin almmolaš lunsj dilálašvuođas. Leigga Mandela ja Luthulis nieiddat, Albertina Nomathuli Luthuli ja Maki Mandela geat ovddasteigga iežaska áhčiid.

Rabai ráfibálkášumičájáhusa – ”Strengths and Convictions”

Dronnet Sonja rabai ráfibálkášumičájáhusa Lulli-Afrihkká nationálgalleriijas. Čájáhus govvida dien njealji Lulli-Afrihkká ráfibálkášumi vuoiti eallima ja dálááiggi. Fotogovat, dálááiggi dáiddaduojit ja oanehis filmmat leat biddojuvvon oktii ja čájehit riikka molsašuddi historjjá ja movt riikka rievddaid apartheid stivrejumis demokráhtalaš servodahkan. Rahpansártnistis gesii Dronnet ovdan Lulli-Afrihkká ovdamearkan:

- South-Africa has taught the world what can be done when you have visionary statesmen and courageous people. Your country has shown us what can be done when you have strengths and convictions.

Čájáhus galga čájehuvvot Oslos geassemánus skábmamánnui 2010 ja Londonis 2011 giđa.

Maŋŋá seamma beaivvi deaivvadeigga Gonagas ja Dronnet norgga ealáhusaid ovddasteddjiiguin geat barget Lulli-Afrihkkás.

Kultureahket Boiniin ja Madosiniin

Eahkes leaba Gonagas Harald ja Dronnet Sonja mielde kulturdoaluin, gos Mari Boine band čuojaha ovttas Lulli-Afrihkká artisttaiguin Madosini ja Abaqondisi Brothers.

Boine lea riikkaidgaskasaš beakkán gii earenoamáš bures ovddasta sámi kultuvrra. Son ovttastahttá sámi álbmotmusihka ollu eará musihkkavugiiguin, ja maŋemus skearrus lea ge son ovttasbargan Madosiniin.

Madosini lea dovddus stuora musihkar, muitaleaddji ja dánsár, ja su doaibmabáiki lea Townshipas olggobealde Cape Town. Nugo Mari Boines ge, de leat Madosinis maid ruohttasat árbevirolaš musihkas.

Boine ja Madosin čuojaheaba ja lávluba ovttas Abaqondisi Brothers (’ipmárdusa vieljažat’). Koaras leat 12 meillahtu ja lávlu a-capella.

”A taste of Norway”

Eahket loahpahuvvo borramušdilálašvuođain ”A taste of Norway”, gos norgalaš ja lulli-afrihkká goahkat guossohit njálgámus norgga borramušaid ollu gussiide.