Hopp til hovedinnhold

Sámedikki allaáiggalaš rahpan

Majestehta Gonagas rabai odne 6. Sámedikki. Gonagas Harald logai rahpansártni ja Majestehta Dronnet čuovui maid rahpandilálašvuođa.

13.10.2009

Dát allaáiggalaš seremoniija álggahuvvui Gonagaslávlagiin, maid lávlo sihke dárogillii ja sámegillii. Dasto doalai Sámedikki presideanta Egil Olli iežas buresboahtinsártni.

Dasto čađahii Gonagas Harald almmolaš rahpama: ”Mun sávan Sámediggái buresboahtima ovddasvástideaddji bargui ja sávan ahte dat šattašii ávkkalaš sihke sámi álbmogii ja min váhneneatnamii.”

- Sámedikki bargu lea leamaš hui stuora ávkin dasa ahte eatnagat leat ožžon buoret ipmárdusa ja stuorát beroštumi sápmelaččaid dillái ja sámegillii ja sámi kultuvrii, logai Gonagas iežas sártnistis.

Maŋŋel Gonagas sártni de bukte Stuoradikki, Ruoŧa ja Suoma Sámedikkiid ovddasteaddjit ja Guatemala sadjásaš olgoritministtas buresboahtin dearvvuođaid.

Rahpanseremoniija loahpahuvvui Sámisoga lávlagiin.

Sámediggi

Odne rahpojuvvui Sámediggi 6.gearddi. Vuosttaš rahpan lei golggotmánu 9. beaivvi 1989. Dalle doalai Gonagas Olav vuosttaš rahpansártni. Sámediggái huksejuvvui sierra visti Kárášjohkii 2001:s. Sámediggevisti speadjalastá sámi árbevieruid ja kultuvrra.

Sámediggi lea iešheanalaš álbmotválljejuvvon orgána masa sápmelaččat válljejit 39 sápmelačča áirrasin. Sámediggeválga lea juohke njealját jagi seamma beaivvi go stuoradiggeválga. Sámediggi bargá buot áššiiguin mat earenoamážit gusket sámi álbmogii. Sámedikkis lea dakkár árvu ja sadji servodagas ahte dat doaibmá njunuš eavttuid hábmejeaddjin dálá sámepolitihkas ja lea ráđđeaddi orgána sámepolitihkalaš gažaldagain (Gáldo: Regjeringen.no).

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas