Gonagasbearraša guossástallanvierut

Disdaga 15. beaivvi cuoŋománus 1969 vulggiiga dalá Ruvdnaprinsa Harald ja Ruvdnaprinseassa Sonja iežaska vuosttaš stuora, almmolaš mátkái Norggas. Soai válljiiga vuolgit Finnmárkui ja čuovvoleigga ge nu boares guossástallanárbevieru.

Gonagas Haakon ja Dronnet Maud mátkkošteigga Davvi-Norgii juo 1907:s, ja Ruvdnaprinsa Olav ja Ruvdnaprinseassa Märtha finaiga davimus oasis riikkas vuosttaš geardde 1934:s.

1969 prográmmii ledje biddjojuvvon ollu doaimmat. Mátki álggii Girkonjárggas, ja 10 beaivvis galggaiga soai finadit Kárášjogas, Leavnnjas, Guovdageainnus, Álttás ja Bardufossas, lassin ollu eará smávva báikkiide. Soai finadeigga buohcciviesuin, skuvllain, boarrásiid siiddain, dálueamitskuvllas ja duodjeskuvllas. Suodjalussii giddiiga earenoamáš fuomášumi. Davvi-Norgga Brigaden lei ovddasvástideaddji muhtun oassái prográmmas ja lei maid gussiid láidesteaddjin mátkki maŋemus beivviid. Ruvdnaprinsa cokkai uniforpma ja seasai Heggelia, Skjold ja Sætermoen militearatroppaid.

Ruvdnaprinsabárra beasai maid oaidnit ja vásihit sámi kultuvrra ja eallinvuogi. Soai cokkaiga gávttiid maid oaččuiga skeaŋkan ja vujiiga herggiiguin duoddaris. Soai leigga maid mielde ipmilbálvalusas girkus ja muhtun sámi bearaš guossohii lávus sudnuide hearrámállása. Dát guossástallan bovttii beroštumi maiddái olggobealde Norgga. Mátkki birra čállosat ja govat mátkkis ledje mielde gilvimin dieđuid ja beroštumi sámi kultuvrra ja Davviguovlluid eamiálbmoga birra.

Fylkkamátkkit

Diet mátki Finnmárkui álgagii ge vieru mii dál lea, ahte Gonagasbárra čađaha fylkkamátkkit jahkásaččat. Gonagas lea cealkán ná sártnis maid doalai beaivvi ovdal 1991 sivdnádallama:

”Ruvdnaprinsan ja Ruvdnaprinseassan mearrideimme moai ahte galge oahpásnuvvat iežamet álbmogii ja eatnamii. Munno fylkkamátkkit ledje ge dihtomielalaččat lágiduvvon joksan dihtii dien mihttomeari. Diekkár mátkkiin beasaime finadit báikkiin gos muđui árvideamis ean lean šaddat fitnat, smávva gilážiin áhpegáttiin, doaresbeal duottargilážiin ja smávit industribáikkiin. Danin leat ge fylkkamátkkit hui ávkkálaččat lassin munno eará mátkkiide maid čađahetne feara gos dán riikkas.”