Ollu vásáhusat Mexicos

Dasa lassin doalai Ruvdnaprinsa Haakon logaldallama duhátjagiulbmiliid birra UNAM - Universitehtas Nacional Autónoma de Mexico.

Iđđes boradii Ruvdnaprinsa álggos ealáhusiđitbiepmu ovdal go almmolaččat rabai ovtta ealáhusseminára Mexico Citys.

Ealáhusat

Meksikána ekonomiija lea máilmmi 15 stuorámus ealáhusaid searvvis, ja Mexico lea miellagiddevaš ovttasbargoguoibmi norgga ealáhusaide. Ruvdnaprinsabára Mexico delegašuvnnas leat fárus badjel 80 ovddasteaddji eanet go 50 norgga fitnodagain.

Club de Industriales lea Mexicos deháleamos forum ealáhusolbmuide. Ruvdnaprinsa Haakon rabai otná seminára ja deattuhii sáhkavuorustis makkár vejolašvuođat leat ain viiddidit ovttasbargguid. Norga ja Mexico ovttasbargaba juo ollu surggiin, eandalii petroleumindustriijas. Ruvdnaprinsa deattuhii ahte ávkkástallan ferte dáhpáhuvvat luonddu gierdama ja ovddasvástideami vuođul, ja ahte dien dáfus sáhttá norgga teknologiija leat ávkkálaš veahkki.

Finai HIV/Aids-klinihkas

Ruvdnaprinseassa Mette-Marit finai Clinica Condesa HIV-Aids-klinihkas. Dát lea almmolaš dearvvašvuođaklinihkka gos leat spesialiseren iežaset HIV/Aids dálkkodeapmái ja eastadanbargguide. Dáppe gávnnadit maid dat iešguđetlágan doarjjajoavkkut. Klinihkka dikšu birrasii 6000 pasieantta jahkásaččat, ja lea áidna klinihkka Mexico Citys mii váldá vuostá pasieanttaid geain ii leat buohcandáhkádus. Clinica Condesas lea sierra prográmma mii čalmmustahttá olmmošvuoigatvuođaid ja bargá HIV-eastademiin dakkár olbmuiguin geat leat gillán seksualálaš illásteami.

Lei klinihka jođiheaddji dr. Andrea Gonzáles Rodriguez gii válddii vuostá Ruvdnaprinseassa, ja Ruvdnaprinseassa beasai maid deaivvadit olbmuiguin geat leat ohcan klinihkas veahki.

Horacio Franco čuojahii musihka gussiide. Son lea okta máilmmi čeahpimus njurggonas čuojaheddjiin, ja geavaha iežas beakkánvuođa ovddidit homofiillaid vuoigatvuođaid.

Logaldallan duhátjagiulbmiliid birra

Ruvdnaprinsa ja Ruvdnaprinseassa manaiga goappešagat UNAMii – mii lea almmolaš universitehta man váldobáiki lea Mexico Citys. UNAM universitehtas leat 300.000 studeantta ja doppe čađahit stuora oasi Mexico dutkandoaimmain. Dáppe doalai Ruvdnaprinsa logaldallama dan birra makkár vásáhusaid son lea čohkken UNDP-ambassadevra doaimmas ja son logaldalai maid UN duhátjagiulbmiliid birra. Maŋŋá logaldallama vástidii Ruvdnaprinsa studeanttaid gažaldagaid.

Rabai arkiteaktačájáhusa

Ruvdnaprinseassa čađahii ”Kristin Jarmund Architects- Selected work almmolaš rahpama. Das ovdanbuktet norgga arkitektuvrra ollislaččat, leat sihke čájáhusat, logaldallamat ja workshop. Dat lea jurddašuvvon leat vuođđun guhkesáiggi ovttasbargui UNAM ja NTNU Trondheim arkitektuvra fakultehtaid gaskka.

Kristin Jarmund lei ieš maid doppe, ja son muitalii čájáhusa birra ja movt sin dainna leat bargan.

Norgga filbmavahkku

Ruvdnaprinsa Haakon lea norgga filmmaid suodjaleaddji, ja son doalai rahpansártni mii álggahii ovttasbarggu gaskal Norgga ja Mexico filbmainstituhtaid.

Ollu norgga filmma ovddasteaddjit leat mielde dán norgga delegašuvnnas, earet eará filbmadahkkit Nils Gaup, Bent Hamer, Bård Breien ja Eva Sørhaug, geain buohkain leat filmmat mat galget čájehuvvot Guadalajara filbmafestiválas maŋŋelaš dan vahku.

Čájehuvvui oassi visot dan viđa filmmas mat galget čájehuvvot, ja Nils Gaup doalai oanehaš álgosága Kautokeinoopprøret filmma birra. Kautokeinoopprøret /Guovdageainnu stuimmit lea Mexico City norgga filbmavahku rahpanfilbma.

Vuostáváldin

Beaivi loahpahuvvui almmolaš vuostáiváldimiin, maid Knut Solem, Norgga ambassadevra Mexicos, lágidii.