Hopp til hovedinnhold

Ruvdnaprinsabárra Guovdageainnus

DD.KK.HH. Ruvdnaprinsa Haakon ja Ruvdnaprinseassa Mette-Marit finaiga Guovdageainnus ja Kárášjogas Sámi álbmotbeaivvi ávvudeami oktavođas guovvamánu 6. beaivvi.

05.02.2009

Ruvdnaprinsabára guossástallan álggii Guovdageainnus guovvamánu 5. beaivvi:

Logaldallan boazodoalu birra

Guovdageainnus beasaiga Ruvdnaprinsa ja Ruvdnaprinseassa gullat davviguovlluid boazodoalu birra. Lei Anders Oskal gii doalai dan logaldallama. Oskal lea ”The International Centre for Reindeer Husbandry” jođiheaddji.

Skohtermátki Bađášjohkii

Maŋŋel logaldallama vulge sii mátkkoštit skohteriin Ávžžis Bađášjohkii. Mátkki vuolde bisánedje sii moatte geardde. Álggos bisánedje Sonjavađas, gos muittašedje ahte lea 40 jagi vássán dan rájes dalá Ruvdnaprinseassa Sona finai dien báikkis.

EALAT dutkanprošeavtta fealtabáikkis muitaledje Ruvdnaprinsabárrii oanehaččat prošeavtta birra. Go doppe vulge, de sii bisánedje Ávževuomis gos Ole Henrik Magga muitalii dálu sámiid kultuvrra birra.

Ealoluhtte

Ja de joavddaiga Ruvdnaprinsa ja Ruvdnaprinseassa ártnihasaid siidii, goas soai beasaiga ealu oadnit ja fitnat lávus. Guovdageainnu joatkkaskuvlla ja boazodoalloskuvlla oahppit čájehedje movt suohpaniin galgá njoarostit ja movt vuodjit gilvvu herggiiguin.

Sámi borramušat

Ruvdnaprinsa Haakon ja Ruvdnaprinseassa Mette-Marit beasaiga máistet sámi borramušaid beaiveborramuššan. Sii guossohedje sudnuide bohccobierggu nugo sápmelaččat dán lávejit vuoššat ja guossohit. Boradettiin muitalii Karen Anna Logje Gaup dan birra go Gonagasbárra finai su guossis dalle go soai leigga headjamátkkošteamis 1969:s.

Ruvdnaprinsabárra beasai maid oahppat movt sápmelaččat oidnet muohttagis nuppástuvvamiid mat čuvvot dálkkádagaid rievdamiid.

Dan maŋŋá vulggiiga Ruvdnaprinsa ja Ruvdnaprinseassa Jergol Duottarstohpui, gos guossohedje mállásiid ja goas soai oruiga lávus ija.

Guoskevaš leaŋkkat

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas