Møtte techjenter og teknologibedrifter

Kronprins Haakon besøkte eit fylke med spesielt store behov for omstilling, sidan mykje av olje- og gassverksemda i landet ligg her.

Teknologi og kompetanse frå petroleumsnæringane gjev samtidig eit godt utgangspunkt for å utvikle nye løysingar i andre næringar.

Norsk lagerrobot

Første stopp på programmet var AutoStore – ei bedrift som lagar robotiserte lagerløysingar til fleire store selskap og har kundar i 30 land verda over.

Synnøve Matre i AutoStore viser korleis robotane deira har utvikla seg sidan oppstarten i 1996. Foto: Simen Løvberg Sund, Det kongelege hoffet

Kronprinsen vart vist rundt i lokala til hovudkontoret, som ligg i bygda Åmsosen i Nedre Vats. Avdelingssjef Synnøve Matre har vore i selskapet nesten heilt sidan starten for 25 år sidan og gav Kronprinsen eit innblikk i korleis robotane har utvikla seg frå første til siste modell.

Kronprinsen fekk òg sett på eit testsystem og korleis robotane raskt og effektivt hentar og plasserer varer i eit lager.

Techjenter og gründerar i Haugesund

Etter besøket i Vindafjord gjekk turen vidare til Haugesund folkebibliotek, der 100 jenter var samla til Girl Tech Fest.

Femteklassingane fekk utforske kva teknologi kan brukast til – saman med kvinnelege rettleiarar frå teknologiyrke. Jentene fekk i oppgåve å programmere, animere og lage spel.

– Eg håpar de får ein kjempefin dag – og at de blir inspirerte til å jobbe meir med teknologi og realfag i åra som kjem, sa Kronprinsen til deltakarane på Girl Tech Fest.

Kronprinsen lét seg imponere av jentene og det dei hadde lært i løpet av dagen. Foto: Simen Løvberg Sund, Det kongelege hoffet

Girl Tech Fest vart arrangert for første gong i 2015 og blir arrangert på bibliotek og vitensenter over heile landet. Målet med festdagen er å auke interessa hos jenter for teknologi og realfag i ein alder der interessa fort kan dabbe litt av.

Kronprins Haakon har følgt gründermiljøet i fleire år. På Gründerloftet i Haugesund hadde Innovasjon Norge samla ei rekkje verksemder som bidreg til eksportinntekter gjennom internasjonal vekst, og som utnyttar teknologien utvikla for olje og gass til å skape nye produkt.

Kronprinsen vart presentert for gründerar og vekstbedrifter som arbeider med alt frå apputvikling til batteriteknologi og offshore havvind.

Kronprinsen i samtale med gründeren Vibeke Vestre i Sky of Norway, som lagar eit digitalt verktøy for interiørdesignarar. Foto: Simen Løvberg Sund, Det kongelege hoffet

Gjennom dagen vart Kronprinsen følgd av ordførarane i Vindafjell og Haugesund, Ole Johan Vierdal og Arne-Christian Mohn, og politimeister Hans Vik og av Bent Høie på den tredje dagen hans som statsforvaltar i Rogaland.