SIKT i gang i Bodø

Sendinga startar i morgon, tysdag 26. oktober, klokka 08.30. Da er det offisiell opning med talar av ordførar i Bodø kommune Ida Maria Pinnerød, rektor Hanne Solheim Hansen ved Nord universitet og Kronprins Haakon.

Sjå SIKT direkte hos Nord universitet

Etter den digitale utgåva i fjor er det Nord-Noreg og kulturbyen Bodø som er arena når SIKT-konferansen samlar nærare 200 deltakarar frå heile landet under same tak.

SIKT-deltakarane i år er på plass i Bodø. Foto: Robin Bøe, SIKT

"Muligheter"

Frå scenen vil deltakarane blant anna høyre forsvarssjef Eirik Kristoffersen og journalist Kadafi Zaman. Kjersti Thorbjørnsrud og Marjan Nadim, begge frå Institutt for samfunnsforsking, vil òg delta i ein samtale om ytringsklimaet i Noreg. Mange av deltakarane skal sjølve på scenen og snakke under overskrifta «Muligheter» – årets tema.

Bodø-ordfører Ida Maria Pinnerød fortalte om mulighetene i regionen. (Foto: Robin Bøe, SIKT)

Deltakarane skal òg få utfordre seg med ein workshop frå det franske universitetet INSEAD.

Sjå heile programmet på SIKT.org

Konferansen startar i ettermiddag med ein tur langs Saltfjorden, besøk til Jektefartsmuseet, workshop og førelesingar i Stormenkvartalet. Konferansier i år er Lydia Gieselmann.

Lydia Gieselmann er konferansier i Bodø. (Foto: Robin Bøe, SIKT)

Deltakarane kjem frå heile landet og representerer næringsliv, gründerar, offentleg sektor, organisasjonsliv, kultur, idrett, media og akademia. Formålet med konferansen er å skape ein møteplass der deltakarane skal kunne lære av kvarandre og diskutere felles utfordringar og moglegheiter i Noreg i framtida.

Kom til Bodø med tog

Kronprinsen og ei rekkje av deltakarane kom til Bodø i dag tidleg med tog.

Kronprinsen møtte 50 unge vaksne som bur i Nord-Noreg og er engasjerte i framtida til landsdelen. Foto: Simen Løvberg Sund, Det kongelege hoffet

I forkant av konferansen møtte Kronprinsen 50 unge frå Nord-Noreg som er med i «Unge stemmer», eit kompetanseprogram i regi av SpareBank1 Nord-Norge.

Han deltok òg på ein lunsj med regionalt næringsliv om unge og moglegheiter i Nord-Noreg.