Hopp til hovedinnhold

Gávpotvánddardeapmi ja mearragáttečorgen Fredrikstadas

Fredrikstadas lea Gamlebyen, gávpoga boares oassi, mearra ja mearragáddi, gelddolaš nuoraidfitnodat ja el-gávpotfeargat. Buot dán beasaiga Gonagaslaš Allavuođat Ruvdnaprinsa ja Ruvdnaprinseassa muosáhit Fredrikstada galledettiin odne.

30.09.2021

Ruvdnaprinsa álggahii gálledeami Cafe Hanco oahppoarenas.

Doppe besset nuorat geat iešguđetge sivaid geažil eai leat joatkkaskuvlla vázzime, vejolašvuođa ahtanuššat ja guorrat geainnu oahpahussii ja ámmáteallimii.

Doaibmajođiheaddji Gunhild Rosnes ja fidnooahppi Andreas Tusvik (20 jagi) oahpisteigga Ruvdnaprinsa Haakona Cafe Hancos. Sii fitne gievkkanis gos Ruvdnaprinsa beasai máistit lákcajieŋa man doppe ieža ráhkadit ja liegga geassebeivviid vuvdet gávpogis.

Ráhkkanan hummerbivdui

Riv & Røsk ossodat bargá visteráhkadusaid gaikut ja muoraid njeaidit maid de ferkot, goikadit, páhkkejit ja vuvdet.

Nuorat ledje báttiid gárvvisteamen hummerbivdui go Ruvdnaprinsa finai guossis. Son čálii namas bivdorusttegii maid nuorat galget váldit mielde ihttin go dán jagáš hummerbivdu álgá – sii doaivut dat buvttášii bivdolihkku.

Ruvdnaprinsa čálii namastis bivdorusttega sierra oassái go gálledii Cafe Hanco. Oassi atno bivdorusttega merkemii, hummerbivdui mii álgá juohke jagi golggotmánu 1. beaivvi. Govva: Berit Roald / NTB

Nuorat ledje hui bures oahppan lágaid ja njuolggadusaid dovdat – goas hummera sáhttá bivdit, makkár hummera ii dárbbaš fas merrii luoitit ja makkárat bivdorusttegat galget. Dasto bivdoáigodagas báhccet sidjiide sullii 20 hummera mainna nuorat besset herskostallat iežaset hummerfeasttas. Gaskkal 40 ja 60 hummera leat beare smávvát – dahje beare stuorrát – ja daid ferte fas merrii luoitit.

Gálledii Gamlebyena, dološ gávpoga

Ruvdnaprinsabárra de ges manai elektralaš gávpotfeargái mii njulgii Fredrikstada Gamlebyenii, dološ Fredrikstadii.

Gamlebyenis, dološ Fredrikstad gávpogis, Alexander Hermansen válddii vuostá Ruvdnaprinsabára ja oahpistii bára gávpogis.

Oahpisteamis muitaluvvui gávpoga historjjá 1567 rájes – dalle go gávpot vuođđuduvvui. Oahpisteapmi loahpahuvvui Gonagasa toarggas gos dánskka-Norgga gonagas Fredrik II čuožžu iežas nannánjuolggi alde guovdu toargga – gávpogis masa attii iežas nama, muhto ii goassige šaddan gállet.

Ruvdnaprinsabárra Fredrikstadas. Govva: Berit Roald / NTB

Gáibidahkes čorgen mearragátteguovllus

Beaivi loahpahuvvui mearragáttečorgemiin Gransrødbuktas Øra luonddumeahcceguovllus. Mearrabirrasa nuoskideapmi lea máilmmiviidosaš birasváttisvuohta – ja ollásit olbmo sivva. Plásta lea buot vearrámus.

Ruvdnaprinsabárra čorgii doabbariid olbmuiguin Maritim Omsorgas ja olbmuiguin geat leat Kriminálafuolahusa vuolde ja Alit Ruosas.

Ruvdnaprinsabárra searvvai mearragáttečorgemii Gransrødbuktas (Øra luonddumeahcceguovlu). Olbmot kriminálafuolahusas ja Are Grønsrud Alit Ruosa bealis oahpistedje sudno. Govva: Berit Roald / NTB

Soai beasaiga oaidnit ahte leat olu doabbarat ruoššeguovlluin, muhto váttis doppe čorget. Plásta ja eará doabbariid lea váttis gávdnat. Ollugat Norggas eaktodáhtolaččat áŋgiruššet mearragáttiid čorget, muhto dakkár guovlluide gáibiduvvojit erenoamáš searaid.

Loahpahii gálledeami

Gálledeapmi Fredrikstadas loahpahii golmma beaivásaš fylkamátki Vikenis gos gálledeigga maiddái Siskkit Østfolda, Vålera ja Mossa suohkaniid.

Gaskavahkkoeahket maiddái golahuvvui Fredrikstadas – vuostáiváldimis Gamelbyenis – gos Ruvdnaprinsabárra nuppes deaivvadii máŋgasiiguin geaiguin lei daid beivviid deaivvadan. Mátkkis leat leamašan olu deaivvadeamit mánáid ja nuoraiguin.

-Moai letne deaivvadan nu olu mánáid ja nuoraiguin main lea áŋgirvuohta, váikkuhanfápmu ja čielga oaivilat, Ruvdnaprinseassa Mette-Marit dajai.

-Beaivvit leat leamašan hávskit ja hui miellagiddevaččat, ja moai letne deaivvadan áŋgiris olbmuiguin geat beroštit iežaset ruovttubáikkis, ja geat duođai váikkuhit olbmuid loaktimii, Ruvdnaprinsa dajai go loahpahii gálledeami.

 

 

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas