Sakka ráhkisvuohta ruovttuguvlui

- Juoidá deháleamos olbmuide lea guovlu masá dovdá gullevašvuođa. Báiki mas berošta ja sáhttá ruoktun váldit. Ja ruovttubáiki – dat lea doppe gos váibmu lea, Gonagaslaš Allavuohta Ruvdnaprinseassa dajai sártnistis odne faláštallanšiljus Våleris.

- Álohii go johte miehtá riikamet, ja deaivvadetne olbmuiguin, ráhkisvuohta ruovttuguvlui vuhtto. Maiddái dáppe Våleris letne dan čielgasit vuohttán, son dajai.

Ruvdnaprinsa Haakon beasai Vålera Faláštallanšiljus dart-spábbačiekčama geahččalit. Govva: Simen Løvberg Sund, Gonagaslaš hoavva

Girjái eaktodáhtolašvuohta Våleris

Árabut seammá beaivve Gonagaslaš Allavuohta Ruvdnaprinsa lei Bergtunas deaivvadan moanat gili eaktodáhtolaš bargiiguin. Doppe ledje olbmot Speaidáris, Østfold modellbåtklubbas ja KNA Varnas ja sii muitaledje iežaset doaimma birra.

Bergtun lea šillju gosa leat čohkken boares viesuid ja dávviriid, ja doppe galledettiin Ruvdnaprinsa Haakon beasai vásihit lávluma, dánsuma, divttalohkama, alpakka ja svelaid trollkremain – mat stálut guossuhedje.

Ruvdnaprinsa Haakon giitá liđiid ovddas maid Olivia Stoltmann (4) ja Caspian Rinden Hjort (4) geigiiga, go Ruvdnaprinsabárra bođii Vålerii Bergtuna olgomuseai. Govva: Simen Løvberg Sund, Gonagaslaš hoavva

Ruvdnaprinsa maid gilvvii muora šilljui – “Ruvdnaprinsa ninnamuorra”. Lei maid deaivvadeapmi 4 nuoraidskuvllaohppiiguin, Jacob, Alise, Angelica ja Isak, geat leat fuobmán ABS60 – automáhtalaš buollinbáhtaran-ráidalasa ráhkadit. Geassemánus sin fuomášupmi vuittii SMARTingen – bálkkašupmi Ungt Entreprenørskap oktavuođas Vikenis. Olles 93 joavkku serve iešguđetge fuomášumiiguin finálas.

-Vássán hástaleaddji beannot jagis, mii leat mearkkašan man bures báikegottit atnet fuola iežaset ássiin. Nu mot dáppe Våleris – sihke dii geat lehpet guhkit áiggi dáppe ássan ja sii geat oalle aitto leat deike fárren, Ruvdnaprinseassa dajai sártnistis.

Loga Ruvdnaprinseassa sártni

De leigga ge soai Ruvdnaprinssain aitto deaivvadan Karimeain, Rohollahain, Fazlollahain ja Royain teadjagohpu jugistit. Dát njealjis, oappážagat ja vieljažagat, bohte kvohtabáhtareaddjin Norgii 2016:s.

Ruvdnaprinsabárra beasai deaivvadit njeallje báhtareaddjiiguin Kirkebygden skuvllas ja vel sin vásáhusaid gullat. Govva: Heiko Junge / NTB

Quiza ja kubba nuoraiguin ja eallilan olbmuiguin

Galledeapmi Vålera falástallanšiljus loahpahuvvui dart-spáppačiekčamiin ja zumba- dánsumiin – ovdal go mátki manai viidáseappot Mossii ja Skoggata fuolahanvistái gávpoga guovddážis.

Ássi Evy Behn Gustavsen sávai Ruvdnaprinsabárrii bures boahtima liđiiguin. Govva: Simen Løvberg Sund, Gonagaslaš hoavva

- Doppe deaivvadeimme duhtavaš ássiiguin, ja bargiiguin Generasjon M:as – ideála fitnodat mii doalvu nuoraid ja vuorrasiid oktii, nu loahpahii Ruvdnaprinsa galledeami maŋŋel.

- Lea movttiidahtti oaidnit mot fuolahusa, hálddašangálgga ja dieđu sáhttá atnit albma buori bargohárjehusas. Ja velá suohttasiin, son dajai.

Fuolahusvisti dovddavásihusgárddis lei sihke quisa, kubba ja ságástállan, otná ođđasiid birra, ássiiguin ja M-ustibiiguin Mikaela Stordalain, Silje Jervaniin ja Stine Engebretseniin.

Ossodathoavda Tone Jørgensen ja Ali Hassan Ahmed Generasjon M:as oahpistii Ruvdnaprinsabára galledeami oktavuođas.

Dáidaga gaskkustit mánáide ja nuoraide

Galledeapmi Mossas loahpahuvvui Alby dálus ja dovddus Galleri F15:is. Doppe Ruvdnaprinsa beasai gullat mánáidkoara mánáid Mossa-lávlaga lávlume. Lávlla čállojuvvui gávpoga diimmáš 300 jagi ávvudeapmái. Doppe guossuhedje Alby-rinkkela, ja Ruvdnaprinsa Haakon maid beasai gullat mot galleriija barga dáidaga gaskkustit mánáide ja nuoraide.

Kulturskuvlla mánáidkoara lávlume mánáid Mossa-lávlaga mii čállojuvvui gávpoga diimmáš 300-jagi ávvudeapmái. Govva: Simen Løvberg Sund, Gonagaslaš hoavva

Blikkåpnerat Ludvig Rakeng Mpagi ja Evelina Ksenya Soltys oahpisteigga Ruvdnaprinsa “Folkets arena” paviljongas. Blikkåpnerat leat nuorra skuvlavázzit geat oasseáiggi barget dáidaga gaskkustit.

- Deaivvadit nuoraiguin geat dáidagis beroštit, nu go dii dáppe Jeløyas, fátmmasta, ja lea vel ávkin dáidaga demokratiseret, jáhkán mun, Ruvdnaprinsa dajai.

Ruvdnaprinsa Haakon hupmá Blikkåpner nuorra guoktáin Ludvig Rakeng Mpagian ja Evelina Ksenya Soltysain “Folkets arena” paviljongas. Govva: Heiko Junge / NTB

-Duollet dálle buohkaide livččii dárbu eará ládje áššiid geahčadit, eará perspektiivvas. Leš go eambbo dáidaga geahčadit, ovttastallat nuorra olbmuiguin geain leat ođđa jurdagat, dahje vuorrasiiguin, geat leat guhkit eallán. Nu soaitit áššiid oaidnit maid mii eat leat ovdal oaidnán, dahje fuomášit juoidá ođđasa doppe gos eat leat doarvái bures ohccán, Ruvdnaprinsa dajai go loahpahii gálledeami Skoggata fuolahusvisttis ja Galleri F15:s Mossas.

Loga Ruvdnaprinssa sártni

Otná eahket doallába Ruvdnaprinsabárra vuostáiváldima Restaurant Værk:as Fredrikstadas, ja ihttin loahpahuvvo ge fylkamátki galledemiin Fredrikstadas.