Njuike váldosisdollui

75 jagi dan rájes friddjan beasaimet

– 75 jagi leat vássán min riikka historjjá iloleamos beivviid rájes: Viimmat beasaimet friddjavuođa ávvudit maŋŋá vihtta sevdnjes soahtejagiid, logai Majestehta Gonagas sártnistis Akershus ladnis odne.

08.05.2020

Gonagas Harald Bođii Ladnebáikái ovttas Majestehta Dronnegiin ja Gonagas Allavuođaguovttuin Ruvdnaprinssain ja Ruvdnaprinseassain.

Kommandánta Arne Opperud, stuoradiggepresideanta Tone Wilhelmsen Trøen (ii leat govas fárus), stáhtaministtar Erna Solberg, suodjalusministtar Frank Bakke-Jensen ja suodjalushoavda Haakon Bruun-Hanssen vuostáiválde Gonagasbára ja Ruvdnaprinsabára Akershus ladnis. Govva: Lise Åserud, NTB scanpix

Vuostálastiolmmái Carl Johan Oftedahl

Gonagas muitalii álggus sártnistis Carl Johan Oftedahl birra, gii lei Stavangeris eret. Son čohkkái 1941 dálvvi duiska fáŋgavuođas Akershus ladnis. Nasisttat ledje su dubmen jápmimii ovttas eará norgalaččaiguin, danin go sii ledje leamaš mielde vuostálastinbargguin.

– Maŋemus eahkeda iežas eallimis buvttii son dearvuođaid maid su mielas lei hui dárbu dieđihit sidjiide geat báhce: "Dolvot dearvuođaid min riikka ássiide ja muitalehket ahte sii galget Norgga hukset ráhkisvuođain." Die leat buorit dearvuođat maiddái dán áiggi. 75 jagi leat vássán min riikka historjjá iloleamos beivviid rájes: Viimmat beasaimet friddjavuođa ávvudit maŋŋá vihtta sevdnjes soahtejagiid, logai Majestehta Gonagas sártnistis Akershus ladnis odne.

Gudnijahtii vuostálastiid

Gonagas bijai lieđđekránssa « Našunálamonumeanta 1940-45 soađis gahččan olbmuid» lusa, maid dáiddár Gunnar Janson lea ráhkadan, ja mii rahppojuvvui 1970:s.

Gonagas Harald bidjá lieđđekránssa Našunálamonumeantta lusa. Govva: Lise Åserud, NTB scanpix

Gonagas Harald giitalii buohkaid geat juogaman láhkái leat váikkuhan friddjavuhtii beassamii ovttas min riikka lihtolaččaiguin 75 jagi dás ovdal:

– Dii, ovttas singuin geat eai šat leat dáppe min gaskkas, eallibehtet álo min riikka giitevaš muittuin.

Unnit ávvudeapmi

Dán beaivvi ledje jurddašan stuorrát ávvudit miehta riikka, muhto koronavirusa leavvan lea čuohcan friddjavuođa ávvudeapmái maid.

– Otná dilis, gos mis buohkain lea veaháš unnit friddjavuohta, mii máŋgasiidda lea váttis áigi, de galgat ge muitit maiddái nannet guhtet guimmiideamet. Dasgo midjiide lea fas muittuhuvvon dat man nannosit mii leat čadnon iežamet smávit ja stuorát oktavuođaide. Dál mii galgat ohcat buot buoremus beliid juohkehaččas – vai juohke okta lágis mielde beassá nannet min riikka boahtteáigái. Mii galgat čuovvut vuostálastiolbmá Carl Johan Oftedahl ávžžuhusa: Mii galgat Norgga hukset viidáseappot ráhkisvuođain, logai Gonagas loahpalaččat.

Gunnar Jansona «Našunálamonumeanta 1940-45 soađis gahččan olbmuide». Govva: Sven Gjeruldsen, Gonagaslaš hoavva

Stáhtaministtar Erna Solberg doalai maid sártni friddjanbeassan ja veteránaid beaivái, miessemánu 8.beaivvi, ja soalddáhiid ovddas doalai løytnánta Camilla Brevik Hågensen sártni.

− Odne mii geassit leavggaid stákkuide miehtá riikka, juste seammaládje go dagaimet 75 jagi dás ovdal, dán seamma beaivvi. Ráfi ja friddjavuođa eat leat ožžon nuvttá, eat mii galgga goassege vajáldahtti dán dehálaš oasi iežamet historjjás, logai stáhtaministtar.

 

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas