Hopp til hovedinnhold

Gonagaslaš hoava jahkeraporta 2019

Gonagaslaš hoavva almmuha odne iežaset jahkeraportta. Gonagaslaš Allavuođa Prinseassa Ingrid Alexandra konfirmašuvdna lei Gonagasviesu váldolágideapmi, ja stuorámus lágideapmi mii lei Šloahtas 2019:s.

17.04.2020

Truvdnoárbbolaš konfirmerejuvvui Šloahttakapeallas borgemánu 31. beaivvi, ja dan maŋŋá bovdejedje lunšii Stuora boradansálas.

Olles Norga

Gonagasbearrašii lea dehálaš beassat deaivvadit olbmuiguin miehtá riikka, ja 2019:s finai Gonagasbearaš 47 suohkanis dán riikkas, 15 fylkkas. Gonagasbearaš lea leamaš mielde 723 almmolaš lágidemiin ja lea ieš leamaš lágideaddjin 2 294 gussiide.

Eanemus guossit fitnan Šloahtas

2019:s fitne eanet guossit Šloahtas go goassege ovdal. Dan ovcci vahku geasset go Šloahtta lea rabas álbmogii, fitne badjel 51 000 guossi doppe. Čájáhusas «Dronningmøter»/«Dronnegiid deaivvadeapmi» čájehuvvo biktasat ja diŋggat Dronnet Maud ja Dronnet Sonja áiggis, ja dan čájáhussii liikojedje oallugat sihke dán riikkas ja olgoriikkain. Čájáhus lei ordnejuvvon lagas ovttasbargguin Den Norske Opera & Ballett /Norgga Operain/Baleahtain.

Sihkarvuođaprošeakta

Maiddái dán jagi, nugo diibmá ge, lea Gonagaslaš hoava sihkarvuođaprošeakta leamaš jagi stuorámus eaŋkilprošeakta. Dat siskkilda Šloahta ja eará gonagaslaš opmodagaid sihkarvuođadoaimmaid. 2019:s leat čađahuvvon ollu roggandoaimmat Dronnetpárkkas ja Šloahttapárkkas. Dat lea earet eará dan sivas go leat ođasmahttimin párkka čuovggaid ja lámppáid, ja go leat álggahan vissis báikkiide sihkarvuođabargguid.

Jahkerehketdoallu

2019 jahkerehketdoallu čájeha 138 miljovnna ruvnno buorrin. Das leat 130 miljovnna čadnon sihkarvuođaprošektii. Buot ruhta lea čadnon sihkarvuođaprošeavtta ollašuhttimii.

Gonagaslaš hoava jođihanrehketdoallu čájeha ahte gávcci miljovnna lea báhcán buorrin. Dat ahte lea báhcán ruhta buorrin, boahtá eanas das go gaskaboddosaš virggiide eai leat virgáduvvon olbmot, ja go prošeavttat lea duvdiluvvon ovddos ođđa oastinmearrádusaid ja kapasitehta ráddjejumiid geažil. Dat mii lea báhcán buorrin, galgá geavahuvvot rehabiliterenprošeavttaid čađaheapmái ja muđui háhkamiidda.

 

Gonagaslaš hoava jahkeraporta oktan 2019 jahkedieđáhusain lea doaimmahuvvon Stuoradikki Presideantagoddái, Gielda- ja ođasmahttindepartementii ja Riikarevišuvdnii.

 

Guoskevaš leaŋkkat

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas