Gonagaslaš hoava 2017 jahkeraporta

Gonagasbára 80-jagi beaivvit leat leamaš guovddážis miehtá 2017. Sudno riegádanbeivviid oktasaš almmolaš ávvudeapmi lei miessemánu 9. ja 10. beaivvi. Ávvudeamis ledje gonagaslaš guossit miehtá Eurohpá. Geassemánus lei Gonagasbárra ávvumátkkis Oppland ja Hedmark fylkkain – joatkkan riddomátkái maid Gonagasbárra čađahii 2016:s sudno 25-jagi ávvudeami oktavuođas.

Dronnet Sonja Dáiddastállja lei Gonagasa 80-jagi skeaŋka Dronnegii – ja dat rahppui almmolaččat geassemánu 4.beaivvi. Dáiddastáljas leat leamaš máŋga dehálaš lágideami 2017:s. . Álggos lei rahpančájáhusa, mas čájehuvvui norgga dálaáiggi grafihkka viidát – ja dasto jagi loahpas lei Gonagasbearraša ovdal juovllaid čoagganeapmi gussiide geat barget gáhtalagas bargguid ja eaktodáhtolaš organisašuvnnain.

Rabas Šloahtta lea geasuhan badjelaš 45 000 guossi fitnat Šloahtas ja Oscarhállas oanehaš geassevahkuid, ja lagabui 26 000 guossi leat fitnan DáiddaStáljas rahpama rájes jagi lohppii.

Gonagaslaš hoavva ovdanbuktá odne iežas 2017 jahkeraportta. Mii sávvat ahte raporta buvttašii eanet dieđuid ja ipmárdusa Gonagasviesu ja Hoava doaimmaid birra.

Jahkerehketdoallu

Jahkeboađus lea buoret go dat mii lei plánejuvvon ja dan gokčat sestojuvvon ruđain.  Gonagaslaš civilliste jahkerehketdoalus leat maid mielde Ruvdnaprinsabára almmolaš doaimmat, ja dat čájeha 9 879 056 vuolláibáhcaga.

Ovdal dábálaš juolludeami (poasta 50) lea rehketdoalus 3 152 352 kruvnno vuolláibáza, sivas Gonagasbára 80- jagi ávvudoaluid. Dien vuolláibáhcaga leat gokčan liigevuorkkáin maid ovdal leat ráddjen dien ulbmilii. Rehketdoallu čájeha ahte stuora oassi juolluduvvon doarjagiin geavahuvvojit Šloahta ja dasa gullevaš visttiid bajásdoallamii ja ođasmahttimii.

Muđui boahtá loahppavuolláibáza, 6 726 705 kruvnno, das go Gonagaslaš hoava sihkarvuođaprošeakta lea čađahišgoahtán doaimmaid ja investeremiid. Dien vuolláibáhcaga gokčat ovdalaš ráddjejuvvon ruđain mat leat gonagaslaš opmodagaid sihkarvuođaprošeavtta čađaheami várás sestojuvvon.

Rabas Šloahta jahkerehketdoalus lea 2 390 033 kruvnno buorrin. Dat galgá geavahuvvot Rabas Šloahta doibmii.

Gonagaslaš hoava jahkeraporta 2017 oktan jahkerehketdoaluin lea addojuvvon Stuoradikki presideantadoaibmagoddái, Gielda- ja ođasmahttindepartementii ja Riikarevišuvdnii.