Dronnet rabai Riddu Riđđu

Festivála lágiduvvo dál 26. geardde.

– Lea munnje stuora illun beassat leat dáppe, logai Dronnet rahpansártnistis duorastat eahket.

Dronnet lea vuosttaš geardde fitnamin Riddu Riđđu doaluin.

Eamiálbmogat miehtá máilmmi

Dronnet čujuhii dasa ahte lágideapmi lea leamaš mearkkašahtti – debáhttabáikin ja eamiálbmotdáiddáriidda lávdin.

– Riddu Riđđu lea rahpan sámi servodaga máilbmái. Seammás lea festivála addán ovddolaš vásáhusaid ja čájehan veaháš eará eamiálbmogiid dili. Earet eará lea dán jagi lea boahtán eamiálbmotjoavku Alaskas.

Lávlun ja muorraduddjon Alaskas

Ovdal rahpama beasai Dronnet čuovvut oahpisteaddji ja oaidnit festiválabáikki Riddu Siida. Das čájehit eamiálbmogat iešguđet guovllus máilmmis iežaset kultuvrra.

Dronnet beasai earet eará dearvvahit dán jagi davvi álbmotjoavkku, mii lea boahtán Alaskas. Alaska Natives čájehedje muorraduoji, lávluma ja dánsenárbevieruid.

Dronnet lei rahpamin 26. internašuvnnalaš eamiálbmotfestivála Riddu Riđđu. Govva: Lise Åserud, NTB scanpix

Dronnet lei rahpamin 26. internašuvnnalaš eamiálbmotfestivála Riddu Riđđu. Govva: Lise Åserud, NTB scanpix

Gáfestallan ja luođit

Olggobealde mearrasámi goađi dearvvahii Dronnet Sonja juoigi Berit Alette Mienna ja gaskkusteaddji Gerd Mikalsen. Dollagáttis guossohedje gáfe, rabarbramálli – ja juoiggadedje ja ságastalle mearrasámiid birra.

Dronnet devddii aitto 80 jagi, ja doppe ledje maid mánát geat lávlo sutnje riegádanbeailávlaga «Lihkku beivviin».

Festiválarahpan jazz saksofonisttain

Go Dronnet Sonja lei almmolaččat rahpan festivála, de doalai komponista, jazzmusihkar ja saksofonista Mette Henriette Martedatter Rølvåg konseartta.

26-jahkásaččas leat mearrasámis ruohttasat. 2015:s almmuhii son iežas vuosttaš albuma Mette Henriette.