Hopp til hovedinnhold

Norgga girjjálašvuođa ambassadevra

Gonagaslaš Allavuođa Ruvdnaprinseassa Mette-Marit earenoamáš bargun boahttevaš jagiid lea ovddidit norgga girjjálašvuođa internašuvnnalaččat.

26.04.2017

Norgga girjjálašvuođas lea buorre dilli internašuvnnalaččat ja das leat ge hui miellagiddevaš áiggit vuordimis. Okta stuora dáhpáhus dan oktavuođas lea ahte Norga beassá oasálastit váldoriikan,  «guosseriikan», máilmmi stuorámus ja deháleamos girjemeassuin, Frankfurt Girjemeassuin 2019.

Go Ruvdnaprinseassa lea norgga girjjálašvuođa ambassadevra, de son áigu ge oasálastit guovddáš lágidemiin mat gusket guosseriikaprošeavttaide Frankfurt Girjemeassuin.

Norgga girjjálašvuohta viidána máilmmis

- Lean čeavlái ja ilus go beasan álgit bargat norgga girjjálašvuođa ambassadevran Frankfurt 2019 doaluid guvlui. Nugo buohkat mis dihtet, de lea norgga girjjálašvuohta gávdnan guovddáš saji internašuvnnalaš girjehilduin maŋemus jagiid, logai Ruvdnaprinseassa Norgga girjjálašvuođa suorgái ja eará kulturaktevrraide, geat ledje boahtán Sentralen báikái Oslos odne.

Lean čeavlái ja ilus go beasan álgit bargat norgga girjjálašvuođa ambassadevran Frankfurt 2019 doaluid guvlui.

NORLA, Guovddáš mii goziha Norgga girjjálašvuođa olgoriikkain, lei čohkken 250 deháleamos norgalaš aktevrra konferánsii gos galge beassat buktit oaiviliid ja jurdagiid girjemeassuide. Konferánsa čalmmustahtii ahte dál de duođas álget barggut Frankfurt 2019 guvlui. NORLA  lea norgga guosseriikkaprošeavtta čađaheami ovddasvástideaddji.

Váldoriikan máilmmi stuorámus girjemeassuin

Oaivilbuktinkonferánssas lei maid Frankfurt-meassuid direktevra Juergen Boos.

Frankfurt girjemeassut leat máilmmi stuorámus ja deháleamos girjesuorgemeassut. Ja go meassut lágiduvvojit Duiskaeatnamis, mii ollu jagiid lea leamaš norgga girjjálašvuođa uksarahppi máilbmái,  lea diehttelas maid buorre.

Meassuin fitnet birrasii 300 000 guossi juohke jagi.

Ruvdnaprinseassa rolla

Ruvdnaprinseassa rolla norgga girjjálašvuođa ovddideaddjin lea liikká máilmmiviidosaš bargu mii bistá guhkit go 2019 rádjái.

Ráđđehus ja NORLA oidnet Ruvdnaprinseassa girjjálašvuođa áŋggirdeami dehálaš oassin norgga girjjálašvuođa saji nannemis olgoriikkain. Ruvdnaprinseassa lea ollu jagiid čájehan stuora persovnnalaš beroštumi girjjálašvuhtii ja dasa man dehálaš lea movttiidahttit olbmuid vel eanet lohkat, earenoamážit mánáid ja nuoraid.

 Mii livččii Englánda Shakespeare haga? Mii livččii Duiska Goethe haga? Mii livččii Norga  Ibsen haga?

Ruvdnaprinseassa  čujuhii álggus iežas sártnis odne dasa movt girjjálašvuohta veahkeha hukset sihke olbmuid ja servodaga:

- Mii livččii Englánda Shakespeare haga? Mii livččii Duiska Goethe haga? Mii livččii Norga  Ibsen haga? Nie sáhtášeimmet namuhit riika riikka maŋis, buot máilmmi osiin. Ii dušše danin ahte doallat diein dološ čehpiin, muhto danin ahte oainnusindahkat movt girjjálašvuohta hábme min identitehta. Dat hukse našuvnnaid. Dat lea veahkkin ásaheamen min referánssaid, min oktasaš árbbi ja min DNA – dovddažit dál mii iežamet duogáža vai eat. Girjjálašvuohta veahkeha hukset min – eaŋkilolmmožin, servodatoasálastin, norgalažžan, eurohpálažžan ja máilmmiboargárin.

 

På norsk: Kronprinsesse Mette-Marit taler under NORLA (Norwegian Literature Abroad) sin konferanse for innspill og planlegging fram mot den store bokmessen i Frankfurt 2019. Foto: Det kongelige hoff.
Fáktadieđut

Frankfurt girjemeassut

Frankfurt girjemeassut leat máilmmi stuorámus ja deháleamos girjemeassut. Dat bistet vahku golggotmánus. Vuosttaš golbma beaivvi leat buhtis girjesuorggi beaivvit. Dan maŋŋá rahpet uvssaid álbmogii. Duiska girjemárkan lea nubbin stuorámus olles máilmmis.

Girje- ja mediaolbmot 125 riikkain čoahkkanit oastit ja vuovdit vuoigatvuođaid. Meassuin fitnet birrasii 300 000 guossi juohke jagi. Sullii 10 000 journalistta miehtá máilmmi gokčet diein lágideami.

Norga galgá leat meassuid váldoriika (guosseriika) 2019:s – mii lea boađus olles norgga girjesuorggi oktasaš áŋggirdemiin. NORLA – Norwegian Literature Abroad – jođiha barggu 2019 guvlui. Okta váldoulbmilin lea loktet ovdan ođđa girjjálaš jienaid.

Guosseriika čalmmustahttojuvvo earenoamáš bures,  ii dušše meassuin, muhto miehtá Duiskaeatnama. Frankfurtas čájehit guosseriikka ollu lágidemiin čavčča mielde – buot kultursurggiin.

NORLA oaivilbuktinkonferánsa cuoŋománu 26. beaivvi 2017 mearkkašahtii dan ahte dál álgá bargu Norgga áŋggirdemiide hábmet sisdoalu. Ulbmilin lea čájehit min buoremus girjjálašvuođa ja kultuvrra.

Eará guosseriikkain leat hui buorit vásáhusat. Suopma lei konferánssa guosseriika 2014:s ja Islánda 2011:s.

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas