Hopp til hovedinnhold

Máŋggabealatvuohta ja innovašuvdna

Canada márkanat láhčet ollu vejolašvuođaid norgga fitnodagaide. Dan riikkas lea maid hui viiddis kultuvrralaš máŋggabealatvuohta. Ruvdnaprinsabárra čuovui máŋga miellagiddevaš seminára odne.

10.11.2016

Máŋggabealatvuođa nanusvuođat, innovatiiva dearvvašvuođateknologiija ja Norgga- Canada ovttasbargu tuneallajođiheami oktavuođas. Ruvdnaprinsa ja Ruvdnaprinseassa finaiga máŋgga semináras odne fárrolaga ealáhusministariin Monica Mæland.

Máŋggabealatvuohta gievruda

Canada lohkko leat dat riikka máilmmis gos lea stuorámus kultuvrralaš girjáivuohta ja Toronto lea stuorámus máŋggakultuvrralaš gávpot máilmmis. Stáhtaministtar Justin Trudeau lea dadjan ahte dát girjáivuohta lea Canada stuora nanusvuohta: -"Canadians are of every possible colour, culture, and creed and continue to celebrate and revel in our diversity". 

Ryerson Diversity Institute bargá máŋggabealatvuođain stuora organisašuvnnain ja veahkeha sin gávdnat vejolašvuođaid maid bargiid iešguđetláganvuođat addet. Otná semináras besse oasseválddit gullat máilmmi njunuš doaimmaid ovddasteddjiid muitaleamen makkár vejolašvuođaid diet rahpá organisašuvnnaide ja márkaniidda. MAK, mii bargá Norgga gilvalannávccaid ovddidemiin dakko bokte ahte ovddidit kulturgaskasaš gelbbolašvuođa, lei maid fárus otná semináras. Semináras čalmmustahtte máŋggabealatvuođa resursan servvodahkii, fitnodagaide ja eaŋkilolbmuide.

Norgga dearvvašvuođateknologiija Canadas

Maŋŋá seminára máŋggabealatvuođa birra,  de lei Ruvdnaprinsabára prográmmas innovatiiva norgga teknologiija áššin. Innovasjon Norge ja FRAM medtech veahkehit norgga fitnodagaid mat hálidit beassat Canada dearvvašvuođamárkanii. Otná lágideamis besse norgga álggahalli fitnodagat  čatnat dehálaš oktavuođaid eiseválddiid ovddasteddjiiguin, ruhtadanásahusaiguin, dutkanbirrasiiguin ja loahpalaš geavaheddjiiguin.

Ruvdnaprinsa ja Ruvdnaprinseassa beasaiga oaidnit muhtun miellagiddevaš buktagiid maid norgga fitnodagat dáhtoše fállat Canadai.

Ruvdnaprinsabárra oaččui maid vejolašvuođa fitnat semináras man fáddán lei tuneallateknologiija, ovdal go manaiga lunšša boradit Norgga ja Canada ealáhusaid ovddasteddjiiguin.

Little Norway Park

Little Norway Park loahpahii guossástallama Torontos. Párka lea ásahuvvon muitun dan báikái gos lei norgalaš soahtegirdivuddjiid hárjehallanbáiki 2. máilmmisoađis. Majestehta Gonagas Harald finai Little Norway párkkas máŋgii mánnán. Doppe ožžo sihke girdivuoddjit, navigatorat ja mekanihkkárat oahpu – oktiibuot ožžo badjel 3 000 olbmo oahpu dieppe soahtejagiid. Okte ledje bargoveagabráhkat dan báikkis gokko párka dál lea.

Ruvdnaprinsabárra bijai liđiid muitomearkka lusa mii lea dien báikái ceggejuvvon.

Norgalaččat geat ásset Torontos ledje boahtán čuovvut dien seremoniija, ja Ruvdnaprinsa Haakon ja Ruvdnaprinseassa Mette-Marit asttaiga dearvvahit ja ságastallat mánáiguin geat ledje boahtán leavggaiguin ja tennjegiiguin.

 

Torontos vuolgá Ruvdnaprinsabárra viidáseappot St. John'ii, gos maŋemus oassi guossástallanmátkkis čađahuvvo.

 

 

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas