Hopp til hovedinnhold

Nelson Mandela muitodilálašvuohta

Gonagaslaš Allavuohta Ruvdnaprinsa Haakon ja stáhtaministtar Erna Solberg ovddasteigga Norgga Nelson Rolihlahla Mandela muitodilálašvuođas Johannesburggas disdaga juovlamánu 10.beaivvi. 80 000 olbmo, geaid searvvis ledje eatnat stáhta- ja ráđđehusoaivámuččat, gudnijahtte Mandela muittu dieinna dilálašvuođain.

10.12.2013

Muittašandilálašvuohta lágiduvvui dan spábbačiekčanbáikkis gos Nelson Mandela maŋemus gearddi lei almmolašvuođas, namalassii Máilmmigilvvuin spábbačiekčamis 2010. Son gudnijahttojuvvui rohkosiiguin, sártniiguin ja lávlagiiguin.

Lulli-Afrihká vuosttaš čáhppesvarat presideanta jámii juovlamánu 5.beaivvi 2013, 95 jagi boarisin.

Barggai soabalašvuođa ovdii

Mandela šattai friddjavuođa ja dásseárvvu symbolan, ja symbolan apartheid nállevealáhanstivrejumi vuostálastinbargguide Lulli-Afrihkás.

Son čohkkái 27 jagi giddagasas, ja go beasai luovos 1990:s, de son bargagođii njunnošis ásahit politihka mii galggai čalmmustahttit ráfi ja soabalašvuođa. Dan barggu ovddas addojuvvui sutnje Nobel ráfibálkkašupmi 1993:s. Dan oaččui son ovttas Lulli-Afrihká dalá presideanttain Frederik Willem de Klerk.

Nanu báttit

1994:s válljejuvvui Nelson Mandela riikka vuosttaš presideantan friddja válggain, maidda buot riikka boargárat besse searvat. Nelson Mandela lei stáhtaguossástallamis Norggas 1999:s. Norgga ja Lulli-Afrihká gaskkas leat nanu báttit, ii unnimustá dan dihte go Norga doarjjui ANC  apartheid vuostálastinbargguid.

«Mandela jápmima oktavuođas celkkii Gonagas: «Mus leamas nu lihkku ahte lean beassan suinna deaivvadit máŋgga geardde. Nelson Mandela lea munnje leamaš ovdagovvan. Lean ovddošan su jođihannávccaid, duostilvuođa ja viisodaga. Son nagodii buot buoremus beliid gávdnat sihke alddis ja eará mieldeboargáriin dakkár dilálašvuođas gos veahkaválddálašvuohta ja bahávuođa mávssahanhállu ráđđii. Son lea máilbmái čájehan ahte lea vejolaš válljet ráfi mávssaheami sadjái, ahte olmmoš sáhttá válljet dan mii hukse dan sadjái go dan mii njeaidá.»

Mandela hávdáduvvo ruovttugilistis Qunus sotnabeaivvi juovlamánu 15.beaivvi.

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas