Hopp til hovedinnhold

Mátkki loahppa Istanbulas

Majestehtaguovttos Gonagas ja Dronnet loahpaheigga iežaska stáhtaguossástallama Tyrkias odne. Álggus beaivvi leigga soai norgga – turkalaš ealáhussemináras, ja dan maŋŋil oaččuiga soai vejolašvuođa fitnat geahččamin ovddolaš Alit moskéa ja Aya Sofia gárdimiid.

07.11.2013

Otná seminára lágiduvvui gárdimis man namma lea Istanbul Çırağan Palace Kempinski, ja seminára fáddán lei Tyrkia ja Norgga ealáhusovttasbargu. Leat eanet ahte eanet Norgga fatnasat mat huksejuvvojit Tyrkias ,ja Gonagas čujuhii ge dasa ahte man ávkkálaš dat lea goappešat riikkaide go sáhttet ovttastahttit Norgga vásáhusaid turkalaččaid skiipahuksenčehppodagain, ja go sáhttet ovttastahttit Norgga designa turkalaččaid teknologiijain maritiima industriijas, oktan suorgin ovttasbarggus mii sáhttá čájehit movt ovttasbargu lea goappešat riikkaide ávkin.

Gávpotovddideapmi ja arkitektuvra lei muhtun eará fáddá semináras. Norgga arkiteaktakantuvra Nordic Office of Architecture vuittii dá oalle aitto gilvvu ahte beassat tennjet máilmmi stuorámus girdišilju, mii galgá huksejuvvot olggobeallái Istanbul gávpoga, ja otná semináras čájehedje máŋga eará gávpotovddidanprošeavtta.

Gonagas hálidii maid sáhkavuorustis namuhit ahte mearraborramuš lea eará ášši mii sáhttá nannet ovttasbarggu:

In this area, too, Turkey and Norway are finding more and more win-win effects. Sharing experience and expertise in seafood production and handling is one example; feeding a healthy population with Norwegian products that augment rather than compete with Turkish production is another.

Alit moskéa ja Aya Sofia

Maŋŋel seminára beasai Gonagasbárra fitnat sihke Alit moskéas (dahje Sultán Ahmet-moskéas, mii lea moskéa namma) ja Aya Sofia gárdimis. Diet guokte ovddolaš stuora gárdima leat huksejuvvon oalle lahkalaga Istanbula boares gávpotoassái, Sultanahmet.

Alit moskéa huksejuvvui Sultán Ahmet áiggi, álggugeahčen1600- logu, ja lea okta stuorámus moskéain Istanbulas. Dat lea alit nama ožžon danin go dan siskkobeale seinniin leat eanas vilgesivnnát keramihkkageađggit main leat alit hearvvat.

Aya Sofia hukset lea duhát jagi boarráseabbo (huksejuvvon  532–537) ja lei dan áiggi risttalašvuođa stuorámus girku. Go turkalaččat válde vuollásis Konstantinopela 1453:s, de ráhkaduvvui Aya Sofia moskéan – ja dasto dat áiggi mielde sekulariserejuvvui ja ásahuvvui 1934:s musean.

Gonagas logai iežas Tyrkia mátkki birra ná, vuosttaš sáhkavuorus mii sus lei dán guossástallama oktavuođas:

Sullii duhát jagi dás ovdal, dalle go Norgga vikiŋggat borjjastedje deike, de gohčui sin oaivámuš sin geahččat njuolga ovddos go riidejedje gávpogii, ja galge dahkaluddat ahte sin mielas mahkáš ii leat gávpoga hearvásvuohta ovddošanveara.  Dál mii gal beassat sihke geahččat ja ovddošit.

Odne veaigin loahpahuvvo stáhtaguossástallan lunššain gos Istanbula guvernøra Hüseyin Avni Mutlu ja su roavvá Mutlu leaba guossoheaddjit.

 

Gonagasbárra Norgga ja Tyrkia preassain, buktimin loahpalaš kommentáraid, olggobealde Aya Sofia (Govva: Lise Åserud, NTB scanpix)
Fáktadieđut

Faktadieđut Tyrkia birra

Oaivegávpot: Ankara

Stuorámus gávpogat: Istanbul, Ankara, Izmir

Viidodat: 770 760 km² (Norga: 385 186 km²)

Olmmošlohku 2010: Sullii 76,8 miljovnna

Almmolaš giella: Tyrkia-giella

Stivrejupmi: Republihkka

Stáhtaoaivámuš 2013: Presideanta Abdullah Gül

Diplomáhtalaš oktavuođat gaskal Tyrkia ja Norge ásahuvvo 1925:s, ja riikkaid gaskasaš oktavuođat leat hui buorit.

Norgga gálvovuovdin Tyrkia lassána jagis jahkái, ja mearrabiebmu lea dat gálvu man johtu lea earenoamáš buorre. Statkraft lea investeren čáhcefápmodoaimmaide, ja dađistaga eanet Norgga fatnasat huksejuvvojit Tyrkias.

Badjel 400 000 norgalačča fitne Tyrkias 2012:s, ja ollugat ásset dohko. 2012:s ledje badjel 5000 norgalačča ožžon ássanlobi. Norggas orrot sullii 16 500 Tyrkia stáhtaboargára ja norgalaččat geain leat ruohttasat Tyrkias.

Gáldu: Olgoriikadepartemeanta

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas