Hopp til hovedinnhold

Norgga-Suoma ovttasbargu

Guovddážis dáid beivviid stáhtaguossástallamis lea Suoma ja Norgga ovttasbarggu nanusmahttin. Eske iđđes čuovui Majestehta Gonagas Presideantta Sauli Niinistö Girjjálašvuođavissui/Litteraturhuset, gos Presideanta doalai logaldallama «In the same neighbourhood».

11.10.2012

Presideanta čalmmustahtii eandalii dan makkár vejolašvuođat livčče Suoma-Norgga davviguovlluid ja Árktalaš ovttasbarggu vel eanet nannet. Logaldallama čuovui ságastallan mas leigga mielde Presideanta Niinistö ja Ulf Sverdrup, Norgga Olgoritpolitihkalaš Instituhta (NUPI) direktevra, ja maiddái guldaleaddjit besset searvat.

Dien dilálašvuođa lei NUPI ja Suoma ambassáda lágidan lagas ovttasbarggus.

Litteraturhuset

Iđđesbeaivvi logaldallan lei Girjjálašvuođaviessu Oslos, ja dan maŋŋil muitalii sadjásaš direktevra Monica Helvig Dronnet Sonjai ja presideantaroavvái Jenni Haukioi iežaset doaimmaid birra. Girjjálašvuođaviessu rahppojuvvui 2007:s, ja lea Eurohpá stuorámus girjjálašvuođaviessu, gos leat juohkelágan doaimmat. Doppe lea sihke girjegávpi ja kafea, ja dasa lassin leat ollu sálat gos lágiduvvojit logaldallamat ja digáštallamat. Badjel 250.000 olbmo fitnet dien viesus juohke jagi.

Girjjálašvuođaviessu lea jur Šloahttašilju bálddas, ja go lei nu čáppa čakčadálki, de vácciiga Dronnet ja Presideantaroavvá párkka čađa ruovttoluotta Šlohttii fas.

Čoahkkimat ealáhusaiguin

Maŋŋel logaldallama čuovui Gonagas Harald Presideantta Næringslivets Hovedorganisasjon kantuvrraide, gos lei čoahkkin Norgga-Suoma ealáhusovttasbarggu birra. Ollu stuora fitnodagaid jođiheaddjit ledje doppe, ja ságastallamis ledje čuovvovaš fáttát

  • ceavzilis huksemat ja ceavzilvuohta ovdamunnin gilvvuin
  • Suoma-Norgga ovttasbargu suodjalusas ja eará allateknologalaš surggiin
  • Árktalaš riggodagaid ovttas hálddašeapmi ja ovttasbargu
  • oktasaččat bargat olahit Ruošša márkaniidda

Maŋŋel almmolaš lunšša Ráđđehusa ovddastanviesus, gos ledje sihke Gonagasbárra, Presideantabárra ja Ruvdnaprinsabárra, lei áigi vuolgit fitnat Rommen skuvllas ja kulturguovddážis.

Rommen skuvla

Ruvdnaprinseassa rabai Rommen skuvlla ja kulturguovddáža 2010:s. Rommen lea Stovneris Oslos – gávpotoasis gos lea kultuvrralaš girjáivuohta. Stuora eanetlohku skuvlla ohppiin leat unnitlogugielagiid mánát, ja leat olles 55 iešguđetlágan našuvnnaid ovddasteaddjit doppe.

Rommen skuvla asáhttá leat ovdamearka mii čájeha movt sáhttá bures bargat searvadahttimiin ja kultuvrralaš girjáivuođain, ja Gonagasbárra ja Presideantabárra besse humadit sihke oahpaheddjiiguin ja ohppiiguin, diehtojuohkima ja kulturčájehemiid oktavuođas.

Rommen Skuvla ja Kulturguovddáš lea sihke ohppiid doaibmaguovddáš ja maiddái deaivvadanbáiki váhnemiidda ja muđui báikkálaš servodahkii. Doppe lea sihke girjerájus, falástallanhálla mas leat ollu vejolašvuođat ja kulturlávdi.

Vuostáiváldin

Odne eahkes leat Gonagasbárra ja Ruvdnaprinsabárra Presideantta Sauli Niinistö ja su roavvá Jenni Haukio guossit vuostáiváldimins Operas.


Ihttin vuolgiba Presideanta ja su roavvá Haukio Romsii gos maŋemus oassi stáhtaguossástallamis galgá leat. Ruvdnaprinsa Haakon čuovvu Presideantabára lágidemiin Romssas.

 

 

Kongeparet og det finske presidentparet besøkte Rommen Skole og Kultursenter under statsbesøkets andre dag (Foto: Det kongelige hoff)
Fáktadieđut


Dieđut Suoma birra

Oaivegávpot: Helsset (Helsinki)
Stuorámus gávpogat: Helsset, Tammerfors ja Åbo

Viidodat: 338 000 km²

Olmmošlohku 2012: sullii 5,3 miljovnna
Almmolaš gielat: Almmolaš gielat: Suomagiella, ruoŧagiella, ja (muhtun suohkaniin) sámegiella.

Stivrenvuohki: Republihkka
Stáhtaoaivámuš 2012: Presideanta Sauli Niinistö

Norgga ja Suoma diplomáhtalaš oktavuođat ásahuvvo cuoŋománu 6.beaivvi 1918, maŋŋá go suopmelaččat almmuhedje iežaset sierranan Ruošša fámu vuolde eret juovlamánu 6.beaivi 1917.

Suoma ja Norgga gaskavuohta lea hui buorre, lea lagas oktavuohta eanas surggiin politihkas, suodjalusas, kulturdoaimmain ja ealáhusain. Majestehtaguovttos Gonagas ja Dronnet leigga Suomas stáhtaguossástallamis 2007:s.

2010:s lei Suopma Norgga 11.deháleamos gálvooastiriika, ja 13.deháleamos gálvovuovdinriika, ja dien guovtti riikka gaskanisgávppašeapmi lea lassáneamen. Dál leat sullii 220 norgalaš fitnodaga ásahuvvon Supmii.

Gáldu: OD

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas